আগত ঈদ-উল-আজহাত এইবেলি গো-ধন কোৰবানী নিদিয়াৰ সিদ্ধান্ত গ্ৰহণ কৰিছে ধুবুৰী জিলাৰ তামাৰহাট থানাৰ অন্তৰ্গত হাতীধুৰা জামে মছজিদ কমিটী, ঈদগাহ কমিটী আৰু বৃহত্তৰ মুছলমান সমাজে৷ হাতীধুৰা জামে মছজিদ প্ৰাংগণত আজি এক সংবাদ মেল অনুষ্ঠিত কৰি উক্ত সিদ্ধান্তৰ বিষয়ে ঘোষণা কৰে৷ সংবাদমেল সম্বোধন কৰি হাতীধুৰা জামে মছজিদ আৰু ঈদগাহ কমিটীৰ কৰ্মকৰ্তাসকলে কয় যে অসম চৰকাৰৰ গো-সুৰক্ষা আইনক সমৰ্থন জনাই গো-ধন কোৰবানীৰ পৰা সম্পূৰ্ণৰূপে বিৰত থাকিব হাতীধুৰা জামে মছজিদ, ঈদগাহ কমিটী আৰু ইয়াৰ অধীনষ্ঠ ৮২খন মছজিদৰ সমাজ কমিটীয়ে৷ কোনোবাই যদি ইয়াক আওকাণ কৰি গো-ধন কোৰবানী কৰে তেন্তে তাক সামাজিকভাৱে বৰ্জন কৰাৰো সিদ্ধান্ত গ্ৰহণ কৰিছে বুলি সংবাদ মেলত সদৰী কৰে৷
উল্লেখ্য যে আজি শুকুৰবাৰৰ জুম্মাৰ নামাজৰ পিছতে আয়োজন কৰে উক্ত সংবাদ মেলৰ৷ সকলো ধৰ্মাৱলম্বী লোকৰ মাজত ভাতৃত্ববোধ অটুট ৰখা আৰু গো-সুৰক্ষা আইনক সন্মান জনাই হাতীধুৰা জামে মছজিদৰ লগতে ইয়াৰ অধীনষ্ঠ ৮২খনকৈ মছজিদ কমিটীয়ে যৌথভাৱে উক্ত সিদ্ধান্ত গ্ৰহণ কৰিছে ৷ ঈদৰ দিনা যাতে কোনো দুষ্ট চক্ৰই গোপনভাৱে গো-ধন কোৰবানী কৰিব নোৱাৰে তাৰ বাবে সৰ্বসাধাৰণ ৰাইজক সজাগ হৈ থকাৰ বাবে নিৰ্দেশ দিয়ে৷
অসমৰ বিভিন্ন ঠাইৰ ঈদগাহ সমিতিসমূহে আগন্তুক ঈদত গৰু কোৰবানী পৰিহাৰ কৰা সিদ্ধান্তক মুখ্যমন্ত্ৰী হিমন্ত বিশ্ব শৰ্মাইও প্ৰশংসা কৰে।
মুখ্যমন্ত্ৰীগৰাকীয়ে কয় যে হোজাই, ধুবুৰী, উধাৰবন্দ, বঙাইগাঁও আৰু অন্যান্য কিছু ঠাইৰ ঈদগাহ তথা কবৰস্থান সমিতিসমূহে সমাগত ঈদৰ সময়ত গৰু কোৰবানী পৰিহাৰ কৰিবলৈ জনোৱা আহ্বান অসমৰ সামাজিক সম্প্ৰীতিৰ এক ইতিবাচক আৰু প্ৰশংসনীয় উদাহৰণ।
সংখ্যাগৰিষ্ঠ সনাতনী সমাজৰ অনুভূতিৰ প্ৰতি সন্মান জনাই আইনসন্মত আৰু দায়িত্বশীলভাৱে গ্ৰহণ কৰা এই স্বেচ্ছাসেৱী পদক্ষেপে ৰাজ্যখনত শান্তি, পাৰস্পৰিক বিশ্বাস আৰু সাম্প্ৰদায়িক সৌহাৰ্দ্য অধিক সুদৃঢ় কৰিব।
অসম সদায়েই সহাৱস্থান, সংবেদনশীলতা আৰু পাৰস্পৰিক সন্মানৰ ভূমি। আশা কৰোঁ, আন সমিতিসমূহেও একেই ধৰণৰ আইনসংগত, সৌহাৰ্দ্যপূৰ্ণ আৰু দায়িত্বশীল পদক্ষেপ গ্ৰহণ কৰি সামাজিক দায়িত্ববোধ আৰু সমন্বয়ৰ এই পৰিৱেশ অধিক শক্তিশালী কৰি তুলিব।
