দেশৰ বিখ্যাত শিক্ষানুষ্ঠান নালন্দা বিশ্ববিদ্যালয়ত স্নাতকোত্তৰ পাঠ্যক্ৰমত বিশেষ কৃতিত্ব অৰ্জন কৰিছে অসম কন্যা আকাংক্ষা বসুমতাৰীয়ে। উল্লেখ্য যে -ঢেকিয়াজুলিৰ ৫ নং ৱাৰ্ডৰ বাসিন্দা সুশীল বসুমতাৰী আৰু মণিকা বসুমতাৰীৰ কন্যা আকাংশাই ইতিহাস বিষয়ত স্নাতকোত্তৰ চূড়ান্ত পৰীক্ষাত স্বৰ্ণপদক লাভ কৰিছে। যোৱা ১৯ মে’ত বিশ্ববিদ্যালয় কৰ্তৃপক্ষই স্নাতকোত্তৰ চূড়ান্ত পৰীক্ষাৰ ফলাফল ঘোষণাৰ পিছত তিনিদিন পূৰ্বে ছাত্ৰীগৰাকী ঢেকিয়াজুলিৰ বাসগৃহত উপস্থিত হৈছিল। আকাংশাৰ উপস্থিতিত তেওঁৰ এই সাফল্যত অঞ্চলটোৰ শিক্ষানুৰাগী ৰাইজে গৌৰৱান্বিত হোৱাৰ লগতে ছাত্ৰীগৰাকীক জনাইছে বিশেষ অভিনন্দন।
আজি ‘দৈনিক অসম’ৰ সৈতে হোৱা বাৰ্তালাপত আকাংশাই কয়, মই বহুত গৰ্ব অনুভৱ কৰিছো মোৰ সাফল্যত। পিতৃ-মাতৃ মোৰ সাফল্যত আনন্দিত হোৱাৰ বাবে মই নথৈ আনন্দিত। ভাৰতবৰ্ষৰ এখন অতি পুৰণি বিশ্ববিদ্যালয়ৰ পৰা পোৱা এনে সাফল্যত ওচৰ-চুবুৰীয়া ৰাইজ আৰু বহু শিক্ষানুষ্ঠানৰ বিশেষ ব্যক্তি আজি আমাৰ ঘৰত উপস্থিত হৈছেহি এই কথাই মোক বিশেষভাৱে অনুপ্ৰাণিত কৰিছে। নিখিল বড়ো ছাত্ৰ সন্থাৰ ঢেকিয়াজুলি আঞ্চলিক সমিতি, ঢেকিয়াজুলি আঞ্চলিক ছাত্ৰ সন্থা, বড়ো সাহিত্য সভাৰ লগতে কেইবাটাও দল সংগঠনে সম্বৰ্ধনা জ্ঞাপন কৰিছে আকাংশাক।
