চাপৰৰ কাজিপাৰা নিবাসী তথা ৰত্নপীঠ মহাবিদ্যালয়ৰ ইতিহাস বিভাগৰ মুৰব্বী অধ্যাপিকা বিনীতা তহবিলদাৰ ৰায়ৰ অকাল বিয়োগত শোকস্তব্ধ হৈ পৰিছে সমগ্ৰ চাপৰ অঞ্চল। সুদীৰ্ঘ দুটা দশকৰো অধিক সময় শিক্ষাৰ সেৱাত নিজকে উৎসৰ্গা কৰা অধ্যাপিকা গৰাকীৰ মৃত্যুৱে শোকৰ ছাঁ পেলাইছে শিক্ষাজগতত।
যোৱা ২৭ মে’ত উচ্চ ৰক্তচাপজনিত সমস্যাত আক্ৰান্ত হৈ নিজা বাসভৱনত অসুস্থ হৈ পৰিছিল বিনীতা তহবিলদাৰ ৰায়। পৰৱৰ্তী সময়ত প্ৰথমে বঙাইগাঁও আৰু পিছত গুৱাহাটী চিকিৎসা মহাবিদ্যালয়ত ভৰ্তি কৰোৱা হয় যদিও শনিবাৰে সন্ধিয়া চিকিৎসাধীন অৱস্থাত শেষ নিশ্বাস ত্যাগ কৰে অধ্যাপিকা গৰাকীয়ে।
আজি পুৱা তেওঁৰ নশ্বৰ দেহ চাপৰৰ কাজিপাৰাস্থিত বাসভৱনত অনাৰ পিছত আত্মীয়-স্বজন, শুভাকাংক্ষী, সহপাঠী, গুণমুগ্ধ ব্যক্তি আৰু স্থানীয় ৰাইজে শেষ শ্ৰদ্ধা জ্ঞাপন কৰে। পিছত নশ্বৰ দেহ ৰত্নপীঠ মহাবিদ্যালয়লৈ নিয়া হয়, য’ত সহকৰ্মী, শিক্ষক-কৰ্মচাৰী আৰু ছাত্ৰ-ছাত্ৰীসকলে অশ্ৰুসিক্ত নয়নে শেষ বিদায় জনায়।
উল্লেখযোগ্য যে, ২০০৪ চনৰ এপ্ৰিল মাহত ৰত্নপীঠ মহাবিদ্যালয়ৰ ইতিহাস বিভাগত যোগদান কৰিছিল বিনীতা তহবিলদাৰ ৰায়ে। ২০২২ চনত উচ্চ শিক্ষা সঞ্চালক তথা Director of higher education য়ে গোটেই অসমৰ ৮৬ গৰাকী প্ৰবক্তাৰ চাকৰি সমূহ নিয়মীয়া কৰাৰ উদ্দেশ্যে অসম চৰকাৰৰ নিৰ্দেশ মৰ্মে এক জৰীপ চলিছিল যদিও চাৰি বছৰে কাৰ্যকৰী নোহোৱাত বিনা বেতনে অধ্যাপিকা গৰাকী অকাল মৃত্যুক সাৱটি লয়। শিক্ষা ক্ষেত্ৰত নিষ্ঠা আৰু আত্মনিয়োগেৰে সুদীৰ্ঘ ২২ বছৰে বিনা বেতনত সেৱা আগবঢ়োৱা অধ্যাপিকা গৰাকীৰ অৱদান সদায় স্মৰণীয় হৈ থাকিব।
এগৰাকী নিষ্ঠাবান শিক্ষয়িত্ৰী, এগৰাকী আদৰ্শ সহকৰ্মী আৰু বহু ছাত্ৰ-ছাত্ৰীৰ প্ৰিয় শিক্ষকৰূপে পৰিচিত বিনীতা তহবিলদাৰ ৰায়ৰ বিয়োগত গভীৰ শোঁক প্ৰকাশ কৰিছে বিভিন্ন মহলে। তেওঁৰ বিদেহ আত্মাৰ চিৰশান্তি কামনা কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে সকলোৱে।
