বিগত কেইবাদিনো ধৰি দি থকা মূষলধাৰ বৰষুণৰ ফলত উফন্দি উঠা কৃত্ৰিম বান আৰু লিকাবালি পাহাৰৰ পৰা বৈ অহা পানীৰ ঢলে বুৰাই পেলাইছে চিলাপথাৰ নগৰৰ বহু কেইটা ৱাৰ্ড।৪ নং ৱাৰ্ডৰ জ্যোতিনগৰ আৰু অমৃতপুৰৰ পথৰ দৃশ্য এয়া। আৱদ্ধ লেতেৰা পানী জমা হোৱাৰ বাবে ৰোগৰ সংক্ৰমণ বৃদ্ধি পোৱাৰ আশংকাই দেখা দিছে।
নগৰখনৰ পৰা বৰষুণৰ পানী ওলাই যাব পৰা নলা-নৰ্দমাৰ পৰিকল্পিতভাবে সু-ব্যৱস্থা নথকাৰ বাবেই সৃষ্টি হৈছে এই পৰিস্থিতিৰ। পৌৰসভাৰ কৰ্মকৰ্তা সকলে নগৰ খনক কৃত্ৰিম বানৰ পৰা মুক্ত কৰিবলৈ অহৰহ প্ৰচেষ্টা অব্যাহত ৰাখিছে যদিও বৰ্তমানলৈকে ফলপ্ৰসূ হোৱা নাই।
ইফালে এই কদৰ্যময় পৰিস্থিতি নিয়ন্ত্ৰণৰ ব্যৱস্থা গ্ৰহণৰ বাবে সংশ্লিষ্ট কৰ্তৃপক্ষক ব্যৱস্থা গ্ৰহণৰ বাবে আহ্বান জনাইছে ভুক্তভোগী ৰাইজে।
