দীৰ্ঘদিন ধৰি তেল আৰু প্ৰাকৃতিক গেছ নিগম ( অ’ এন জি চি ) অসম সম্পদ কৰ্তৃপক্ষই থলুৱা ঠিকাদাৰ সকলক পেটে ভাত মাৰি বহিৰাগত পুঁজিপতি গোষ্ঠীৰ স্থাৰ্থত ঠিকা আৱণ্টন কৰি আহিছে । শেহতীয়াকৈ নিগম কৰ্তৃপক্ষই RC2NC1919 নিবিদাৰ জৰিয়তে থলুৱা ঠিকাদাৰ সকলক বঞ্চিত কৰি পুঁজিপতি বণিক গোষ্ঠীৰ স্বাৰ্থত গৰিষ্ঠ সংখ্যক কামৰ ঠিকা আৱণ্টন কৰিছে।
ইয়াৰ প্ৰতিবাদত আজি শিৱসাগৰ জিলা ঠিকাদাৰ ( অ’ এন জি চি ) উন্নয়ন পৰিষদৰ উদ্যোগত নিগমৰ নাজিৰাস্থ মুখ্য কাৰ্যালয়ৰ সন্মূখত অৱস্থান ধৰ্মঘট কাৰ্যসূচী ৰূপায়ণ কৰে।
এই প্ৰতিবাদী কাৰ্যসূচীৰ পিছতো নিগম কৰ্তৃপক্ষই দাবী মানি লৈ শীৰ্ঘ্ৰে কাৰ্যকৰী ব্যৱস্থা গ্ৰহণ নকৰিলে অৱিভক্ত শিৱসাগৰ জিলাৰ তৈলক্ষেত্ৰ সমূহ অনিৰ্দিষ্ট সময়লৈ বন্ধ কৰাৰ দৰে চৰম প্ৰতিবাদী কাৰ্যসূচী গ্ৰহণ কৰিব বুলি হুংকাৰ দিয়ে।
নাজিৰাৰ পৰা দিলীপ হাজৰিকাৰ প্ৰতিবেদন
