জামুগুৰিহাটৰ অন্যতম নাট্যচৰ্চাৰ অনুষ্ঠান “আখৰা”ৰ ৰূপালী জয়ন্তী বৰ্ষৰ লগত সংগতি ৰাখি অনুষ্ঠিত কৰা নাট কৰ্মশালাৰ কালি সফল সামৰণি পৰে৷অঞ্চলটোৰ প্ৰায় দুকুৰিৰো অধিক চেমনীয়া শিশুয়ে অংশগ্ৰহণ কৰা এই কৰ্মশালাৰ সামৰণি অনুষ্ঠানটিৰ লগত সংগতি ৰাখি কালি নিশা জামুগুৰিহাটৰ বাপুজি ভৱন নাট্যমন্দিৰত শিকাৰু চেমনীয়া শিশু সকলৰ দ্বাৰা মঞ্চস্থ কৰা হয় দুখনকৈ শিশু নাট৷নাট্যকৰ্মী ৰঞ্জন কুমাৰ দাসৰ পৰিচালনা আৰু পৰিকল্পনাৰে লক্ষ্মীনাথ বেজবৰুৱাৰ বুঢ়ীআইৰ সাধুকথাৰ “তেজিমলা”ক নাট্যৰূপ দি সুন্দৰকৈ চেমনীয়া শিশুসকলে পৰিৱেশন কৰাৰ লগতে নাট্যকাৰ ননি মজুমদাৰৰ শিশুনাট “জোনাকী মনৰ খৱৰ” নাটখনো শিশুসকলে সু-ললিতভাৱে পৰিৱেশন কৰি উপস্থিত হাজাহ হাজাৰ দৰ্শকক মুগ্ধ কৰি ৰাখিবলৈ সক্ষম হয়৷
বিশেষকৈ শিকাৰু চেমনীয়া শিশুসকলৰ অভিনয়ৰ লগতে নাট দুখনৰ প্ৰতিটো দিশৰ লগত জৰিত কথনশৈলী,ভংগীমা,প্ৰকাশভংগী আদিবোৰে দৰ্শক ৰাইজক যথেষ্ট আপ্লুত কৰা পৰিলক্ষিত হয়৷এককথাত দুয়োখন নাটৰ জৰিয়তে কম সময়ৰ ভিতৰতেই শিকাৰু চেমনীয়া শিশুসকলে বহুখিনি জ্ঞান আয়ত্ব কৰিব পাৰিছে বুলিয়েই মত ব্যক্ত কৰিছে দৰ্শক ৰাইজে৷১৫ দিনীয়া এই প্ৰশিক্ষণকালছোৱাত চেমনীয়া শিশুসকলক নাট কৰ্মশালাৰ প্ৰশিক্ষণটিত প্ৰশিক্ষক হিচাপে নাট্যকাৰ পৰিচালক ৰফিকুল হুচেইন,নাট্যকাৰ তথা সাংস্কৃতিক কৰ্মী ৰঞ্জন কুমাৰ দাস,সহ প্ৰশিক্ষক হিচাপে অভিজিত বৰা,প্ৰাণবল্লভ বৰা,শব্দ প্ৰশিক্ষক হিচাপে ৰক্তিম ৰাজবংশী,মুকাভিনয় প্ৰশিক্ষক হিচাপে পুলক শইকীয়াই প্ৰশিক্ষণ প্ৰদান কৰে৷নাট কৰ্মশালাত অংশগ্ৰহণ কৰা প্ৰতিগৰাকী প্ৰশিক্ষাৰ্থীক “আখৰা”ৰ তৰফৰপৰা একোখনকৈ প্ৰমাণপত্ৰও প্ৰদান কৰে উদ্যোক্তাসকলে৷
কৰ্মশালাখনৰ উপৰিও নিশা মঞ্চস্থ কৰা দুয়োখন শিশুনাট উপভোগ কৰি চেমনীয়া শিশুসকলৰ লগতে “আখৰা”ৰ কৰ্মকৰ্তাসকলক উৎসাহিত কৰা প্ৰতিগৰাকী শুভাকাংক্ষী লোকক কৃতজ্ঞতা জ্ঞাপন কৰে “আখৰা”ৰ সভাপতি ৰঞ্জন কুমাৰ দাস, সম্পাদক বিপুল বৰাৰ লগতে প্ৰতিগৰাকী বিষয়ববীয়াই৷উল্লেখ্য যে অহা ২৮,২৯ আৰু ৩০ অক্টোৱৰত তিনিদিনীয়া বিস্তৃত কাৰ্যসুচীৰে “আখৰা”ৰ ৰূপালী জয়ন্তী বৰ্ষৰ কাৰ্যসুচী উদযাপন কৰা হব৷
