গেলেকী : ক’ভিড-১৯ সংক্ৰমণ ৰোধৰ নামত নাজিৰাত চৰম অৰাজগতাই বিৰাজ কৰিছে। সামাজিক দূৰত্ব, মাৰ্স্ক পৰিধান কৰা এতিয়া ফুটুকাৰ ফেনত পৰিণিত হ’ব ধৰিছে। ৰাজহুৱা স্থান, চৰকাৰী-বেচৰকাৰী কাৰ্যালয়ত ক’ৰনা মহামাৰী সংক্ৰমণৰ পৰা সৰ্তক হোৱা পোষ্টাৰিং বিজ্ঞাপনেৰে দায়িত্ব সামৰিছে চৰকাৰী বিষয়াই। ঠিক তাৰ মাজতে কেন্দ্ৰীয় তথা ৰাজ্য চৰকাৰে আধাৰ কাৰ্ডক নিজা বেংক একাউণ্ট আৰু প্ৰতিটো দৰিদ্ৰ শ্ৰেণী পৰিয়ালৰ নামত থকা ৰেচন কাৰ্ডত নম্বৰ সংযুক্ত কৰা লৈ জাৰি কৰা নীতি নিৰ্দেশনাক ৰাজহুৱা স্বাৰ্থত সূচাৰুৰূপে পালন কৰিব পৰা নাই নাজিৰা মহকুমা প্ৰশাসন ও স্বয়ং মহকুমাধিপতি গৰাকীয়ে। যাৰ বাবে আগষ্ট মাহৰ শেষৰ ভাগৰ পৰা ছেপ্তেম্বৰ মাহৰ আজি তাৰিখতো নাজিৰা মহকুমা মহকুমাধিপতি কাৰ্যালয়ত সদৰৰ বিভিন্ন প্ৰান্তৰ গ্ৰাম্যাঞ্চল, চাহ বাগিচা অঞ্চল আৰু নগৰ অঞ্চলৰ পৰা অহা লোকে আধাৰ কাৰ্ড বনোৱাৰ নামত লানি নিছিগা ভিৰ কৰা পৰিলক্ষিত হৈছে। যি সময়ত বিশ্ব, ভাৰতবৰ্ষকে ধৰি আমাৰ ৰাজ্যত দৈনিক দিনে-নিশাই ভয়ংকৰ মহামাৰীৰ ফলত মানুহৰ অস্বভাৱিক মৃত্যু অব্যাহত আছে। সম্প্ৰতি চৰকাৰী নিৰ্দেশনা অনুযায়ী নাজিৰাবাসী ৰাইজে সদৰৰ মহকুমাধীপতি কাৰ্যালয়ত থকা চৰকাৰী কেৱল মাত্ৰ একোটা শাখাতে আধাৰ কাৰ্ড বনোৱাৰ নামত দৈনিক শ-শ লোকে সামাজিক দূৰত্ব, মাৰ্স্ক পৰিধানৰ পৰা বিৰত থাকি আধাৰ কাৰ্ড বনোৱাক লৈ উদ্বিগ্ন প্ৰকাশ কৰিছে ৰাইজ তথা সচেতন মহলে। আনহাতে নাজিৰা মহকুমা মহকুমাধিপতি ও অতিৰিক্ত উপায়ুক্ত সম্প্ৰীতি গোস্বামীৰ চৰকাৰী দায়িত্বৰ প্ৰতি থকা অৱহেলাৰ বাবেই দুষ্ট চক্ৰই সকলো নীতি নিৰ্দেশনা ভংগ কৰি আধাৰ কাৰ্ড বনোৱাৰ নামত ৰাইজক হাৰাশাস্তি কৰি যোৱাৰ অভিযোগ উঠিছে।
