দৃষ্টিহীন ভাৰতীয় ক্ৰিকেট দললৈ নিৰ্বাচিত কঠীয়াতলীৰ চিমু দাস। নগাঁও জিলাৰ কঠীয়াতলী কছাৰী গাঁৱৰ এগৰাকী দৃষ্টিহীন যুৱতীয়ে ভাৰতীয় দৃষ্টিহীন ক্ৰিকেট দললৈ নিৰ্বাচিত হোৱাৰ খৱৰে কঠীয়াতলী অঞ্চলত আনন্দৰ লহৰ উঠিছে। অসমৰ পৰা প্ৰথম গৰাকী দৃষ্টিহীন মহিলাই যোগ্যতা অৰ্জন কৰিছে আন্ত:ৰাষ্ট্ৰীয় পৰ্যায়ত খেলিবলৈ ৷ উল্লেখ্য যে বিগত জানুৱাৰী মাহত নেপালত অনুষ্ঠিত হোৱা দৃষ্টিহীন মহিলা ক্ৰিকেট প্ৰতিযোগিতাত চিমুয়ে মেন অফ ডা চিৰিজ আৰু মেন অফ ডা মেছ দখল কৰি অসমলৈ গৌৰৱ কঢিয়াই আনে।
এইবাৰ আগষ্ট মাহত ভাৰতীয় ক্ৰিকেট দলৰ হৈ চিমুয়ে ইংলণ্ডত খেলিবলৈ যাব। কঠিয়াতলীৰ অতি দৰিদ্ৰ পৰিয়ালৰ যুৱতী চিমুৰ ভাতৃও বিশেষ ভাৱে সক্ষম৷ মাতৃয়ে ঘৰে ঘৰে দিন হাজিৰা কৰি পোহপাল দি আছে পৰিয়ালটো ৷ চিমুৰ এই যাত্ৰাত অসম ক্ৰিকেট সন্থাৰ লগতে ৰাইজৰ সহায় সহযোগীতা আৰু আশীৰ্বাদ বিচাৰিছে চিমুয়ে ৷ কঠিয়াতলীবাসীৰ আশা চিমুয়ে ইংলেণ্ডত দৃষ্টিহীন মহিলা ক্ৰিকেট দলত অংশ গ্ৰহন কৰি পুনৰ অসমলৈ গৌৰৱ কঢ়িয়াই আনিব ৷
