তেজপুৰৰ প্ৰবীণ কন্ঠশিল্পী, অৱসৰপ্ৰাপ্ত কৃতি শিক্ষক সচ্চিদানন্দ বৰালৈ আগবঢ়োৱা হৈছে চতুৰ্থ বাৰ্ষিক ‘ৰাজেন বৰঠাকুৰ স্মৃতি’ বঁটা। উল্লেখ্য যে তেজপুৰবাসীক শোকাহত কৰি অকালতে কায়িক ভাৱে আঁতৰি যোৱা তেজপুৰ আৰু ৰঙাপৰাৰ প্ৰাক্তন বিধায়ক, নিষ্ঠাবান সমাজকৰ্মী, ক্ৰীড়া সংগঠক তথা তেজপুৰ জিলা ক্ৰীড়া সন্থাৰ প্ৰাক্তন সভাপতি ৰাজেন বৰঠাকুৰৰ স্মৃতি যুগমীয়া কৰি ৰখাৰ অৰ্থে গঢ়ি উঠা” ৰাজেন বৰঠাকুৰ স্মৃতিচাৰণ সমমিতি” য়ে ১০ ডিচেম্বৰৰ মৃত্যুৰ দিনটোত বিশেষ স্মৃতিচাৰণ অনুষ্ঠানৰ আয়োজন কৰি সমাজৰ বিভিন্ন ক্ষেত্ৰলৈ বিশিষ্ট বৰঙণি আগবঢ়োৱা ব্যক্তিলৈ “ৰাজেন বৰঠাকুৰ স্মৃতি বঁটা” প্ৰদান কৰি আহিছে।
ৰাজেন বৰঠাকুৰৰ ওপজা গাঁও নিজ হলেশ্বৰ বাসী ৰাইজৰ সহযোগত এইবাৰো অহা ১০ ডিচেম্বৰ তাৰিখে পুৱা নিজ হলেশ্বৰৰ ৰাজেন বৰঠাকুৰ সোঁৱৰণি মঞ্চত পুৱা ১০ বজাৰ পৰা অনুষ্ঠিত হ’ব লগা চতুৰ্থ মৃত্যুবাৰ্ষিকীৰ বিশেষ স্মৃতিচাৰণ অনুষ্ঠানত তেজপুৰৰ অতি জনপ্ৰিয় প্ৰবীণ কন্ঠশিল্পী তথা সদৌ অসম ছাত্ৰ সন্থাৰ অমূল্য কাকতি বঁটাৰে বিভূষিত সচ্চিদানন্দ বৰাক “ৰাজেন বৰঠাকুৰ স্মৃতি বঁটা” প্ৰদান কৰা হ’ব।
তেজপুৰৰ সাংসদ পল্লৱ লোচন দাস, অসম চৰকাৰৰ অভিভাৱক মন্ত্ৰী পীযুষ হাজৰিকা আৰু তেজপুৰৰ বিধায়ক পৃথ্বিৰাজ ৰাভাৰ লগতে বিশিষ্ট ব্যক্তি সকলৰ উপস্থিতিত পুৱা ৰাজেন বৰঠাকুৰৰ প্ৰতিমূৰ্তিত শ্ৰদ্ধাঞ্জলি আৰু নাম প্ৰসঙ্গৰে আৰম্ভ হ’ব লগা বিশেষ স্মৃতিচাৰণ অনুষ্ঠানত চতুৰ্থ বাৰৰ বাবে প্ৰবীণ শিল্পীগৰাকীক এই বঁটা প্ৰদান কৰা হ’ব।
উল্লেখ্য যে এসময়ৰ ৰাজেন বৰঠাকুৰৰ শিক্ষাগুৰু তথা এগৰাকী জনপ্ৰিয় প্ৰবীণ কন্ঠশিল্পী সচ্চিদানন্দ বৰাই বনগীত, পাৰ্বতি প্ৰসাদ বৰুৱাৰ গীত, চিৰসেউজ অসমীয়া গীতৰ পৰা জ্যোতি সংগীত, বিষ্ণুপ্ৰসাদ ৰাভাৰ গীত আৰু সুধাকণ্ঠৰ গীত সমূহ শুদ্ধ শৈলীৰে শিকোৱাৰ ক্ষেত্ৰত বছৰ বছৰ ধৰি তেজপুৰৰ লগতে তেজপুৰৰ উপকন্ঠ গাওঁ সমূহত নিজাববীয়াকৈ বিশেষ পদক্ষেপ গ্ৰহণ কৰি অহাই নহয় অসমীয়া সোণসেৰীয়া গীত সমূহৰ সংৰক্ষণ আৰু সংবৰ্ধনৰ বাবে বিশেষ পদক্ষেপ গ্ৰহণ কৰি আহিছে।
তেজপুৰ সাহিত্য সভা, বাণ থিয়েটাৰ, পূবেৰুণ সাংস্কৃতিক সমাজকে ধৰি বহু সামাজিক – সংস্কৃতিক অনুষ্ঠানৰ সৈতে ওতঃপ্ৰোত ভাৱে জড়িত সচ্চিদানন্দ বৰাক এই বঁটাৰ বাবে নিৰ্বাচিত কৰাত স্বাভাৱিকতে তেজপুৰৰ ৰাইজ আহ্লাদিত হৈছে।
