এগৰাকী ২০ বছৰীয়া কিশোৰীক স্ক্ৰু ড্ৰাইভাৰে ৫১ বাৰ বিন্ধিলে, হত্যাকাৰীয়ে বিমানেৰে লগ কৰিবলৈ আহিছিল…

ছত্তীশগড়ৰ কোৰবা জিলাত এগৰাকী ২০ বছৰীয়া কিশোৰীক স্ক্ৰু ড্ৰাইভাৰেৰে ৫১ বাৰকৈ আঘাত কৰি হত্যা কৰাৰ অভিযোগ উত্থাপন হৈছে৷ কাৰণ ভুক্তভোগীয়ে অভিযুক্তৰ সৈতে কথা পাতিবলৈ অস্বীকাৰ কৰিছিল। মঙলবাৰে (২৭ ডিচেম্বৰ) এই তথ্য দিছিল আৰক্ষীয়ে। নগৰ আৰক্ষী অধীক্ষক (কোৰবা) বিশ্বদীপক ত্ৰিপাঠীয়ে জনোৱা মতে, এই ঘটনা সংঘটিত হৈছে চাউথ ইষ্টাৰ্ণ ক’লফিল্ডছ লিমিটেডৰ আৱাসিক কলনীত।

ঘটনাস্থলীৰ পৰা বহু সামগ্ৰী উদ্ধাৰ কৰিছে আৰক্ষীয়ে। ইয়াৰ ভিতৰত গুজৰাটৰ পৰা ৰায়পুৰলৈ বিমানৰ টিকট আছে। আৰক্ষীৰ মতে, গুজৰাটৰ পৰা ইয়ালৈ অহাৰ পিছত অভিযুক্তই কোৰবাৰ এখন হোটেলত থাকি সুযোগ পাই ছোৱালীজনীৰ ঘৰত প্ৰৱেশ কৰে। অভিযুক্তই যেতিয়া ভুক্তভোগী মহিলাগৰাকীৰ ঘৰত উপস্থিত হয় তেতিয়া তেওঁ অকলশৰীয়া হৈ আছিল নিজৰ ঘৰত। আক্ৰমণৰ সময়ত অভিযুক্তই কিশোৰীগৰাকীৰ চিঞৰ কোনেও শুনিব নোৱাৰাকৈ মুখত আঠুৱা ৰাখিছিল আৰু স্ক্ৰু ড্ৰাইভাৰেৰে ৫১ বাৰ আক্ৰমণ কৰিছিল।

বিষয়াগৰাকীয়ে জনোৱা মতে, ভুক্তভোগীৰ ভাতৃ ঘৰলৈ উভতি আহোঁতে ভনীয়েকৰ তেজেৰে তিতি থকা মৃতদেহটো দেখা পায়। তেওঁ কয় যে প্ৰাথমিক তদন্তত প্ৰকাশ পাইছে যে যশপুৰ জিলাৰ বাসিন্দা অভিযুক্তই তিনি বছৰ পূৰ্বে যাত্ৰীবাহী বাছত কণ্ডাক্টৰ হিচাপে কাম কৰি ভুক্তভোগীৰ সৈতে বন্ধুত্ব কৰিছিল আৰু ছোৱালীজনীয়ে একেখন বাছতে যাত্ৰা কৰিছিল।

পিছত অভিযুক্তই কৰ্মসূত্ৰে গুজৰাটৰ আহমেদাবাদলৈ গৈছিল আৰু দুয়োৰে ফোনযোগে যোগাযোগ আছিল। বিষয়াগৰাকীয়ে কয় যে যেতিয়া মহিলাগৰাকীয়ে তেওঁৰ সৈতে ফোনত কথা পতা বন্ধ কৰি দিছিল তেতিয়া অভিযুক্তই পিতৃ-মাতৃকো ভাবুকি দিছিল। এই সন্দৰ্ভত এটা গোচৰ ৰুজু কৰি পলাতক অভিযুক্তক বিচাৰি উলিয়াবলৈ চাৰিটা আৰক্ষী দল গঠন কৰা হৈছে বুলিও তেওঁ কয়।