বাঘজানত অইলৰ জুইয়ে ঘৰ বাৰী ধ্বংস কৰা পৰিয়ালক ২০ লাখকৈ আৰ্থিক সাহাৰ্য।

তিনিচুকীয়া : অইলৰ বাঘজান ৫ বিজিআৰৰ জুইয়ে ঘৰবাৰী ধ্বংস কৰা ১১ টা পৰিয়ালক পুনৰ সংস্থাপনৰ বাবে আজি তিনিচুকীয়া জিলা উপায়ুক্ত কাৰ্যালয়ত ২০ লাখকৈ আৰ্থিক সাহাৰ্যৰ চেক প্ৰদান কৰে। অইল ইণ্ডিয়াই প্ৰদান কৰা সাহাৰ্যৰ জিলা প্ৰশাসনে ক্ষতিগ্ৰস্থ পৰিয়ালৰ জৰীপ কৰি আজি  ৰাজ্যিক মন্ত্ৰী সঞ্জয় কিষান, আৰক্ষী অধীক্ষক শিলাদিত্য চেতিয়া, ডুমডুমা ৰাজহ চক্ৰ বিষয়া নন্দিতা ৰয় গোঁহাইৰ উপস্থিতিত উপায়ুক্ত ভাস্কৰ পেগুৱে ক্ৰমে পাপুল চুতীয়া, ৰিতু মৰান, হৰুফুল পাংগিং, দ্বীপ শইকীয়া, অমল শইকীয়া, বিকাশ শইকীয়া, সহদেব মৰান, হেমন্ত মৰান, লক্ষীন্দ্ৰ মৰান, মুনু মুড়া আৰু লাবন্য শইকীয়াক জিলা উপায়ুক্তৰ কাৰ্যালয়ত ২০ লাখকৈ মুঠ ২ কোটি ২০ লাখ টকাৰ চেক প্ৰদান কৰে। আনহাতে আৰু একাধিক পৰিয়াল আৰ্থিক সাহায্যৰ পৰা বঞ্চিত হৈ থকা বুলি বাঘজানৰ স্থানীয় ৰাইজে অভিযোগ অভিযোগ তুলিছে। অবশ্যে বঞ্চিত পৰিয়াল কেইটাই আৰ্থিক সাহাৰ্য লাভ কৰিব নে নাই সেই বিষয়ে প্ৰশাসনে স্পষ্ট মতামত দিয়াৰ পৰা বিৰত আছে।