হালোৱাটিং-গেলেকী সংযোগী পথত নিশা ভয়ংকৰ পথ দুৰ্ঘটনা

গেলেকী : নাজিৰা মহকুমা সীমান্তৱৰ্তী হালোৱাটিঙত নিশা এক ভয়ংকৰ পথ দুৰ্ঘটনা সংঘটিত হৈছে। হালোৱাটিং-গেলেকী সংযোগী পথত যোৱা নিশা তীব্ৰবেগী বলেৰ পিক্‌আপ এ এছ ০৪ বিচি ৪৯২৩মাল কঢ়িওৱা বাহনখনে নিজা পদূলিমুখত তথা পথৰ কাষত থিয় হৈ থকা বৰুৱাআলি পাতৰ গাঁৱৰ নৰেন চুতীয়া (৫৫) নামৰ লোকজনক মহতিয়াই নিয়ে। থিতাতে নিহত হয় দুৰ্ভগীয়া লোকজনৰ। সম্প্ৰতি বলেৰ পিক্‌আপ গাড়ীখনো পথচ্যুত হৈ পথৰ পৰা কিছু নিলগত বাগৰি পৰে। যদিও গাড়ী চালক নতুবা আন কোনো আৰোহী হতাহত হোৱা নাই। স্থানীয় ৰাইজ উপস্থিত হোৱাৰ পূৰ্বে দুৰ্ঘটনা সংঘটিত কৰা গাড়ী চালকে ঠাই এৰি পলায়ন কৰে। ৰাইজে ঘটনা সন্দৰ্ভত আৰক্ষীক খবৰ দিয়াৰ বিপৰীতে আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰি নিশাই মৰণোত্তৰ পৰীক্ষাৰ বাবে শিৱসাগৰ জিলা জয়সাগৰ অসামৰিক চিকিৎসালয়লৈ প্ৰেৰণ কৰিছে। ইয়াকে লৈ অঞ্চলজুৰি উত্তেজনা, ভুক্তভূগীৰ পৰিয়ালে ঘটনাৰ উৎচিত ক্ষতিপূৰণ হিচাপে ২০লাখ টকা দাবী কৰিছে। যাক লৈ এতিয়া অঞ্চলজুৰি শোকৰ ছাঁ। আনহাতে হালোৱাটিং আৰক্ষী থানাই ঘটনা সন্দৰ্ভত পলাতক গাড়ী চালকজনক বিচাৰি অভিযান অব্যাহত ৰাখিছে।