খাৰুপেটীয়া
খাৰুপেটীয়াত এজন যুৱকৰ শৰীৰত ক’ৰোনা পজিটিভ হোৱাৰ সন্দেহৰ খবৰ বিয়পি পৰাৰ লগে লগে অঞ্চলজুৰি তীব্ৰ চাঞ্চল্যৰ সৃষ্টি হৈছে। জানিব পৰা মতে দৰং জিলাৰ শ্যামপুৰ আৰক্ষী থানাৰ অন্তৰ্গত ১নং আৰিমাৰী গাঁৱৰ আমিনুল ইছলামে শিক্ষাগ্ৰহণৰ উদ্দেশ্যে মুম্বাইলৈ গৈছিল। মুম্বাইৰ পৰা চাৰিজন যুৱক ক্ৰমে বুঢ়ীগাঁৱৰ তৰিকুল ইছলাম আৰু তফিকুল ইছলাম, চিকনমাটিৰ জুমৰ আলী, বাইগৰমাৰীৰ আক্ৰামুল হক ঘৰলৈ যাত্ৰা কৰিছিল যদিও লকডাউনৰ বাবে পশ্চিম বঙ্গৰ হাওৰাত থাকিবলৈ লয়। দুমাহ হাওৰা এজন আলহীৰ ঘৰত থাকি চলিত মাহৰ ১৪ তাৰিখে তাৰ পৰা পঠিয়াই দিয়ে৷ যুৱককেইজনে এএছ ২৫ ডিচি ৯৮২৪ নম্বৰৰ চাৰিচকীয়া বাহনেৰে খাৰুপেটীয়ালৈ যাত্ৰা আৰম্ভ কৰে। চলিত মাহৰ ২১ তাৰিখে যুৱক কেইজনে স্ব-ইচ্ছাই গুৱাহাটীৰ সৰুসজাই কোৱাৰেণ্টাইন কেন্দ্ৰত স্বাস্থ্য পৰীক্ষা কৰায়। পিছ দিনা অৰ্থাৎ চলিত মাহৰ ২২ তাৰিখে ঘৰত আহি উপস্থিত হৈ সচৰাচৰ সকলোৰে লগত উঠা বহা কৰি আহিছে যুৱক কেইজন। অাকস্মাৎ বৃহস্পতিবাৰে ৰাতি আৰিমাৰী গাঁৱৰ আমিনুল ইছলাম নামৰ যুৱকজনৰ শৰীৰত ক’ৰোনা পজিটিভ থকা বুলি ফোন যোগেৰে জনোৱা হয়। পিছ দিনাৰ পৰাই গাঁওখনত তীব্ৰ উত্তেজনাই বিৰাজ কৰে। বুধবাৰে আমিনুল ইছলামসহ পৰিয়ালৰ চাৰিজন ব্যক্তিক জিলা প্ৰশাসনে মঙলদৈ অসামৰিক চিকিৎসালয়ত স্বাস্থ্য পৰীক্ষা কৰোৱাই কোৱাৰেণ্টাইন চেণ্টাৰত ৰাখে পৰিয়ালটোক। আনহাতে বাইগৰমাৰী গাঁৱৰ আক্ৰামুল হক নামৰ যুৱকজনকো কোৱাৰেণ্টাইন চেণ্টাৰলৈ যোৱা হয়। তেওঁৰ লগত অহা এই ব্যক্তিসকলকো চিনাক্ত কৰি আছুতীয়া কক্ষত ৰখাৰ লগতে প্ৰয়োজনীয় পৰীক্ষা-নিৰীক্ষা কৰাৰ ব্যৱস্থা কৰিব জিলা প্ৰশাসন আৰু স্বাস্থ্য বিভাগে। ইয়াৰ উপৰি গাঁৱত থকা সময়ছোৱাত আমিৰুল যিসকললোকৰ সংস্পৰ্শলৈ আহিছিল তেওঁলোককো বিচাৰি উলিয়াবলৈ প্ৰয়োজনীয় পদক্ষেপ হাতত লোৱা হৈছে বুলি জানিবলৈ দিয়ে।