‘কা’ বাতিলৰ দাবীত আছুৰ বাইক ৰেলী

তিনিচুকীয়া ১ ছেপ্তেম্বৰ : জাতি, মাটি, ভেটি ৰক্ষা কথা কৈ প্ৰতিটো পদে পদে জাতিটোক চৰম প্ৰতাৰণা কৰা বিজেপি চৰকাৰৰ বিৰুদ্ধে আজি সৰৱ হৈ পৰে তিনিচুকীয়া আঞ্চলিক ছাত্ৰ সন্থা আৰু পানীতোলা আঞ্চলিক ছাত্ৰ সন্থা ৷ সদৌ তিনিচুকীয়া জিলা ছাত্ৰ সন্থাৰ আহ্বান মৰ্মে আজি তিনিচুকীয়া আৰু পানীতোলা আঞ্চলিক ছাত্ৰ সন্থাই যৌথ ভাৱে নাগৰিকত্ব সংশোধনী আইন ২০১৯ বাতিলৰ দাবীত এক বৃহৎ বাইক ৰেলী কাৰ্যসূচী ৰূপায়ণ কৰে ৷ তিনিচুকীয়া আঞ্চলিক ছাত্ৰ সন্থাৰ কাৰ্য্যালয়ৰ পৰা আৰম্ভ হোৱা বাইক ৰেলীটো তিনিচুকীয়া থানা চাৰিআলি হৈ বৰগুৰি আৰু তাৰ পিছত বাই পাছেৰে পানীতোলা বৰুৱাহোলা হৈ পানীতোলা গেটেৰে আহি তিনিচুকীয়া চান্দমাৰী তিনিআলিৰ ওচৰত ৰেলী সমাপ্ত কৰে ৷ প্ৰায় তিনি শতাধিক বাইকেৰে হোৱা এক বিশাল বাইক ৰেলী কাৰ্যসূচীত উপস্থিত থাকে সদৌ তিনিচুকীয়া জিলা ছাত্ৰ সন্থাৰ সাধাৰণ সম্পাদক সমৰজ্যোতি গোঁহাই ৷ কাৰ্যসূচীত উপস্থিত থা্কি সমৰজ্যোতি গোঁহাইয়ে স্পষ্টকৈ চৰকাৰক সকীয়াই দিয়ে যে কোনো মূল্যৰ বিনিময়ত “কা” মানি লোৱা ন’হব ৷ ইয়াৰ কাৰণে যিকোনো প্ৰত্যাহ্বান গ্ৰহণ কৰিবলৈ তিনিচুকীয়া আছু সদা প্ৰস্তুত আছে ৷