শক্তি বিভাগৰ বিৰুদ্ধে মাজুলীত আছুৰ প্ৰতিবাদ; কাৰ্যালয় ঘেৰাও

উজনি-মাজুলী : লোডশ্বেদিঙৰ ফলত চৰম হাৰাশাস্তিৰ সন্মুখীন হৈছে উজনি মাজুলীৰ জনসাধাৰণ ৷ উৎকট গৰমে যি সময়ত ৰাজ্য দহিছে সেই সময়ত উজনি মাজুলীত বিদ্যুৎ কৰ্টনে ৰাইজক জ্বলা কলা খুৱাইছে ৷ আজি জেংৰাই আঞ্চলিক ছাত্ৰ সন্থা আৰু ভকতিদুৱাৰ আঞ্চলিক ছাত্ৰ সন্থাৰ নেতৃত্বত স্থানীয় ৰাইজে শ্ৰীৰাম দেৱোত্তৰস্থিত বিদ্যুৎ বিভাগৰ উপ সংমণ্ডল ঘেৰাও কৰে৷ প্ৰতিবাদস্থলিত উপস্থিত থাকি মাজুলী মহকুমা ছাত্ৰ সন্থাৰ সাধাৰণ সম্পাদক বিতুপন শৰ্মাই ২৪ ঘন্টাই বিদ্যুৎ যোগানৰ প্ৰতিশ্ৰুতি দিয়া চৰকাৰখনক ক্ষুৰধাৰ সমালোচনা কৰি কয় যে এই বিভাগটোৱে বৰ্তমান পৰিস্থিতিত ৰাইজক চৰম যাতনা ভুগাইছে ৷ ঘন্টা ঘন্টা ধৰি লোডশ্বেডিং কৰি ৰাইজক হাৰাশাস্তি ভুগাইছে৷ অতিশীঘ্ৰে মাজুলীত নিয়মীয়া বিদ্যুৎ যোগানৰ ব্যৱস্থা গ্ৰহণ নকৰিলে ছাত্ৰ সন্থাই ধাৰাবাহিক আন্দোলন কাৰ্যসূচী গ্ৰহণৰ হুংকাৰ প্ৰদান কৰে সাধাৰণ সম্পাদক গৰাকীয়ে৷ প্ৰতিবাদ কাৰ্যসূচীত উপস্থিত থাকে জেংৰাই আঞ্চলিক ছাত্ৰ সন্থাৰ সভাপতি দিগন্ত বৰুৱা, সাধাৰণ সম্পাদক মন্টু গায়ন, ভকতিদুৱাৰ আঞ্চলিক ছাত্ৰ সন্থাৰ সভাপতি দীপক টায়েৰ লগতে বহু সংখ্যক ছাত্ৰ সন্থাৰ সদস্য আৰু স্থানীয় ৰাইজ৷ প্ৰতিবাদস্থলিত উপস্থিত হোৱা মাজুলী জিলাৰ বিদ্যুৎ বিভাগৰ অভিযন্ত্ৰা কৃষ্ণ পেগুক ছাত্ৰ সন্থাই স্মাৰক পত্ৰ প্ৰদান কৰি নিয়মীয়া বিদ্যুৎ যোগানৰ দাবী জনায় ৷