‘কা’ বাতিলৰ দাবীত মাজুলীত আছুৰ প্ৰতিবাদ, পুনৰ মাজুলীত আৰম্ভ হ’ল ‘কা’ বিৰোধী প্ৰতিবাদ

উজনি-মাজুলী  : পুনৰ নাগৰিকত্ব সংশোধনী আইন বাতিলৰ দাবীৰে ৰাজপথলৈ নামিল মাজুলী মহকুমা ছাত্ৰ সন্থা৷ মাজুলীৰ মহকুমা ছাত্ৰ সন্থাৰ অন্তৰ্গত প্ৰতিখন আঞ্চলিক ছাত্ৰ সন্থাই আজি মাজুলীৰ বিভিন্ন প্ৰান্তত ‘কা’ বিৰোধিতাৰে প্ৰতিবাদ সাব্যস্ত কৰে৷ মুখ্যমন্ত্ৰী সমষ্টি মাজুলীত ছাত্ৰ সন্থাই পুনৰ ‘কা’ আমি মনা নাই, ‘কা’ আমি নামানো, কা শীঘ্ৰে বাতিল কৰক, কেন্দ্ৰীয় চৰকাৰ হায় হায়, অসম চৰকাৰ হায় হায়, সৰ্বানন্দ সোণোৱাল হায় হায়, নৰেন্দ্ৰ মোডী গ’ বেক, অমিত শ্বাহ হুচিয়াৰ আদি শ্লগানেৰে উত্তাল কৰি তোলে৷ প্ৰতিবাদী কাৰ্যসূচীত উপস্থিত থাকি সদৌ অসম ছাত্ৰ সন্থাৰ কাৰ্যনিৰ্বাহক সদস্য সূৰ্য কুমাৰ ভূঞাই কয় যে- অসম চৰকাৰ আৰু কেন্দ্ৰীয় চৰকাৰে এই জাতিধ্বংসী আইনখন বাতিল কৰক৷ নাগৰিকত্ব সংশোধনী আইন-২০১৯ আমি মনা নাই আৰু নামানো৷ অসাংবিধানিক, সাম্প্ৰদায়িক আৰু খিলঞ্জীয়া বিৰোধী এই আইন শীঘ্ৰে বাতিলৰ দাবী জনায়৷ মাজুলী মহকুমা ছাত্ৰ সন্থাৰ সাধাৰণ সম্পাদক বিতুপন শৰ্মাই কয় যে অসমৰ ৰাইজৰ প্ৰতিবাদৰ ভাষা নুবুজা চৰকাৰখনে যদি এই আইন বাতিল নকৰে তেতিয়া হ’লে ইয়াৰ পৰিণতি ভোগ কৰিব লাগিব বুলি সকীয়াই দিয়ে৷ লগতে কয় যে   পুনৰ এই আন্দোলন আৰম্ভ হৈছে৷ এই আন্দোলন ব্যাপক আৰু প্ৰবল হ’ব৷ যি পৰ্যন্ত কা বাতিল নহ’ব সেই পৰ্যন্ত এই আন্দোলন ধাৰাবাহিকভাৱে চলি থাকিব লগতে কয় অসমে আৰু কোনো কাৰণত অবৈধ বিদেশীৰ বোজা নলয়৷ অসমখন বিদেশীৰ চৰণীয়া পথাৰ নহয়৷ এই আইনখনৰ যোগেদি যি অবৈধ বিদেশী অসমত জাপি দিবলৈ বিচাৰিছে এয়া কোনো কাৰণতে সহ্য কৰা নহ’ব৷ আৰু শীঘ্ৰে এই কা বাতিলৰ দাবী জনাই৷ মাজুলীৰ জেংৰাই আঞ্চলিক ছাত্ৰ সন্থা, পূব মাজুলী, ভকতিদুৱাৰ, গেজেৰা, আঞ্চলিক ছাত্ৰ সন্থাই ফুলনি চাৰিআলিত এই  প্ৰতিবাদী কাৰ্যসূচী ৰূপায়ন কৰে৷ প্ৰতিবাদ স্থলীত জেংৰাই আঞ্চলিক ছাত্ৰ সন্থাৰ সভাপতি দিগন্ত বৰুৱা ভকতিদুৱাৰ আঞ্চলিক ছাত্ৰ সন্থাৰ সভাপতি দীপক টায়েৰ লগতে শতাধিক প্ৰতিবাদকাৰীয়ে মানৱশৃংখল কাৰ্যসূচীত অংশগ্ৰহণ কৰে ৷