বানপানীক লৈ নগাঁও জিলা প্ৰশাসনৰ তৎপৰতা ।

নগাঁও : কৰ’না আতংকৰ সময়ত সাম্ভাৱ্য বানপানীৰ জটিলতা আৰু ব্যৱস্থাপনা সন্দৰ্ভত নগাঁও জিলা উপায়ুক্ত কাৰ্য্যালয় সভা-কক্ষত কালি  জিলা দুৰ্যোগ প্ৰশমন প্ৰাধিকৰণৰ উদ্যোগত এখন গুৰুত্বপূৰ্ণ সভা অনুষ্ঠিত হয়। জিলা উপায়ুক্ত যাদৱ শইকীয়াৰ সভাপতিত্বত অনুষ্ঠিত সভাত জিলাখনত বৰ্তমান সময়ত কৰ’না মহামাৰীক  প্ৰতিৰোধ কৰাৰ লগতে আহি থকা দিনত সম্ভাব্য বানপানীৰ সময়ত লবলগীয়া আগতীয়া প্ৰস্তুতি আৰু কিছু বিশেষ সতৰ্কতামূলক ব্যৱস্থাৰ ওপৰত আলোচনা কৰা হয়। উক্ত সভাত কোভিড-১৯ মহামাৰী প্ৰতিৰোধৰ প্ৰতি লক্ষ্য ৰাখি বানপানীৰ সময়ত যাতে সকলো বিভাগে সক্ৰিয়ভাবে দায়িত্ব পালন কৰাৰ লগতে তৎক্ষণিকভাবে সাহাৰ্য্য শিবিৰ স্থাপন কৰা, বানাক্ৰান্ত লোক অথবা ক্ষতিগ্ৰস্ত পৰিয়ালক সাহাৰ্য্য প্ৰদান, শিশু, গৰ্ভৱতী মহিলা, দিব্যাংগ আৰু জ্যেষ্ঠ নাগৰিকৰ প্ৰতি বিশেষ যত্ন লোৱা, দুৰ্যোগ প্ৰশমন প্ৰাধিকৰণ, অসমৰ নিৰ্দেশাৱলী সাপেক্ষে চাইল্ড ফ্ৰেন্দলি স্পেচৰ ব্যৱস্থা কৰা আদি বিষয়সমূহ পৰ্যালোচনা কৰা হয়। ইয়াৰ উপৰি শিবিৰত বাস কৰা শৰণাৰ্থীৰ বাবে স্বাস্থ্য পৰীক্ষা আৰু সুকীয়া কোৱাৰেন্টীন  চেণ্টাৰৰ লগতে তাৎক্ষণিক এম্বুলেন্স সেৱাৰ ব্যৱস্থাৰ ওপৰতো গুৰুত্ব প্ৰদান কৰা হয়। সভাত নগাওঁ জিলা আৰক্ষী অধীক্ষক  গৌৰৱ অভিজিৎ দিলীপ, অতিৰিক্ত উপায়ুক্ত হেমন্ত ভূঞা, সঞ্জীৱ দলৈ, জিলাখনৰ চক্ৰ বিষয়া সকল আৰু বিভিন্ন বিভাগৰ মুৰব্বী বিষয়া সকল উপস্থিত থাকে।