নগাঁৱৰ দক্ষিণপাটত কৃষি ঋণ সজাগতা- ঋণ পৰিশোধ সভা সম্পন্ন : একেদিনাই ১২ লক্ষাধিক টকা পৰিশোধ। “নিৱনুৱা যুৱক-যুৱতীক কৃষি ঋণৰ জৰিয়তে স্বাৱলম্বী হোৱাৰ আহ্বান বেংক বিষয়াৰ”
নগাঁও : ভাৰতীয় ষ্টেট বেংকৰ খুটিকটীয়া শাখাৰ অধীনত থকা দক্ষিণপাট গ্ৰাহক সেৱা কেন্দ্ৰৰ উদ্যোগত কালি দক্ষিণপাট চাৰিআলিস্থ কেন্দ্ৰটোৰ কাৰ্যালয়তে এখন কৃষি ঋণ সজাগতা আৰু কৃষি ঋণ পৰিশোধ সভা অনুষ্ঠিত হয়। গ্ৰাহক সেৱা কেন্দ্ৰটোৰ পৰিচালক ভাস্কৰ জ্যোতি শইকীয়াই আঁত ধৰা সভাখনত খুটিকটীয়া বেংক শাখাৰ উপ পৰিচালক বিনোদ দে’ আৰু কৃষি সম্প্ৰসাৰণ বিষয়া অৰ্পণ ফুকনে কৃষি ঋণ কেনেকৈ ল’ব পাৰি আৰু কেনেকৈ এই ঋণ পৰিশোধ কৰিব পাৰি; তাৰ ওপৰত বিস্তৃতভাৱে বক্তব্য আগবঢ়াই। লগতে বিষয়াদ্বয়ে অৰ্থৰ অভাৱত কৃষি কৰ্ম কৰিব নোৱাৰা নিৱনুৱা যুৱক-যুৱতী সকলক কৃষি ঋণ লৈ নিজকে স্বাৱলম্বী কৰি তুলিবলৈ আহ্বান জনায়। সভাখনত কেবা শতাধিক ৰাইজে অংশগ্ৰহণ কৰে। কালিৰ সভাতে ইতিপূৰ্বে কৃষি ঋণ লোৱা একাংশ গ্ৰাহকে ১২ লক্ষাধিক টকাৰ কৃষি ঋণ পৰিশোধ কৰে। ইপিনে, সভাত অংশগ্ৰহণ কৰা বিষয়াদ্বয়ে জানিবলৈ দিয়া মতে, প্ৰধানমন্ত্ৰী কৃষি সন্মান নিধিৰ অধীনত আৰ্থিক সাহাৰ্য লাভ কৰা জিলাখনৰ ৩০ সহস্ৰাধিক লোকে খুটিকটীয়া বেংক শাখাটোৰ পৰা কৃষি ঋণ লাভৰ বাবে আবেদন কৰিছে। ইয়াৰ ভিতৰত বেংক শাখাটোৱে প্ৰথম পৰ্যায়ত ১৭ সহস্ৰাধিক কৃষকক কৃষি ঋণ প্ৰদান কৰিব বুলি জানিব পৰা গৈছে।