চাহ বাগিচাৰ উপ-কৰ্মচাৰীৰ দৰমহা বৃদ্ধিৰ দাবীত সৰৱ চাহ মজদুৰ সংঘ : ৩০ জুনৰ পৰা আন্দোলনৰ কাৰ্যসূচী ঘোষণা ।

নাজিৰা : অসমৰ চাহ বাগিচা সমূহত কৰ্মৰত উপ-কৰ্মচাৰীসকলৰ মাহেকীয়া দৰমহা বৃদ্ধিৰ দাবীত সৰৱ হৈ পৰিছে অসম চাহ মজদুৰ সংঘ। উপ-কৰ্মচাৰী সকলৰ দৰমহা বৃদ্ধিৰ বাবে দীৰ্ঘদিন ধৰি দাবী জনাই অহাৰ পিছতো কৰ্তৃপক্ষই বৰ্তমানেও কোনো কাৰ্যকৰী ব্যৱস্থা গ্ৰহণ নকৰাত চাহ মজদুৰ সংঘই আন্দোলনৰ কাৰ্যসূচী ঘোষণা কৰিবলৈ বাধ্য হৈছে। অসম চাহ মজদুৰ সংঘৰ দ্বাৰা সংবাদ মাধ্যমলৈ প্ৰেৰণ কৰা এক বিবৃতি অনুসৰি, অসমৰ বিভিন্ন প্ৰান্তৰ চাহ বাগিচা সমূহত কৰ্মৰত চৰ্দাৰ, চকীদাৰ, কাৰ্পেণ্টাৰ, ড্ৰেচাৰ আৰু এটেনডেণ্টকে ধৰি বিভিন্ন পদত নিয়োজিত অভিজ্ঞ উপ-কৰ্মচাৰীসকলে বাগিচা উন্নয়নত যথেষ্ট গুৰুত্ব প্ৰদান কৰি আহিছে। এই সকল বাগিচাৰ উপ-কৰ্মচাৰীৰ দৰমহা, ভ্ৰমণ, বানছকে আদি কৰি অন্যান্য বিষয় সমূহ বাগিচা মালিক সন্থা অৰ্থাৎ এবিটা, বিচিপি, টাই, এটিপিএ আৰু নেটাৰ এক উমৈহতীয়া সন্থা চাহ বাগিচা মালিকী সন্থা (চি চি পি এ) চুক্তি কৰে। অসম চাহ মজদুৰ সংঘ আৰু চি চি পি এৰ মাজত অনুষ্ঠিত দ্বি-পাক্ষিক চুক্তিৰ দ্বাৰাই বাগিচাৰ উপ-কৰ্মচাৰীসকলৰ মাহেকীয়া দৰমহা আৰু চুক্তি নিৰ্ধাৰণ কৰা হয়। কিন্তু পূৰ্বৰ চুক্তি খনৰ ম্যাদ ২০১৮ চনৰ ৩০ ছেপ্টেম্বৰত অন্ত পৰাত বিগত ২১ মাহ অতিক্ৰম কৰাৰ পিছতো চি চি পিয়ে বাগিচাৰ উপ-কৰ্মচাৰী সকলৰ দৰমহাকে ধৰি অন্যান্য বিষয় সমূহ সমাধানৰ বাবে কোনো ধৰণৰ পদক্ষেপ গ্ৰহণ কৰা নাই। এই সম্পৰ্কত অসম চাহ মজদুৰ সংঘৰ কেন্দ্ৰীয় নেতৃবৰ্গই পূৰ্বৰ চুক্তি ম্যাদ শেষ হোৱাৰ পূৰ্বৰে পৰা নতুন দৰমহা আৰু চুক্তি স্বাক্ষৰ কৰিবলৈ আগজাননী হিচাপে ২০১৮ চনৰ ২৫ এপ্ৰিলৰ পৰাই চি চি পি এৰ লগত আলোচনা কৰাৰ উপৰি চলিত মাহলৈকে কেইবালানি আলোচনা কৰাৰ পিছতো চি চি পি এৰ পৰা কোনো ধৰণৰ সন্তোষজনক সহাৰি লাভ নকৰাৰ অভিযোগ উত্থাপিত হৈছে। কিন্তু যোৱা ২২ জুনত অসম চাহ মজদুৰ সংঘ আৰু চি চি পি এৰ মাজত ভি ডি অ’ কনফাৰেঞ্চৰ জৰিয়তে হোৱা আলোচনাত চি চি পি য়ে উপ-কৰ্মচাৰী সকলৰ দৰমহা বৃদ্ধি বিষয়টো অনীহা আৰু অপৰাগতা প্ৰকাশ কৰাত অসম চাহ মজদুৰ সংঘ ক্ষুন্ন হৈ পৰিছে। যাৰ পৰিপেক্ষিত্বত উপ-কৰ্মচাৰী সকলৰ দীৰ্ঘদিনীয়া দৰমহা বৃদ্ধিৰ দাবী চি চি পি এ য়ে পূৰণ নকৰাত অসম চাহ মজদুৰ সংঘৰ আহ্বানত ৭ জুলাইত সমগ্ৰ অসমতে চাহ বাগিচাৰ শ্ৰমিক সকলে সৰ্বাত্মক কৰ্ম বিৰতিৰে বাগিচা বন্ধ কাৰ্যসূচী ৰূপায়ণ কৰিছে। এই কাৰ্যসূচীৰ পূৰ্বে ৩০ জুনত বাগিচাৰ ইউনিট কমিটীৰ নেৰ্তৃত্বত সামাজিক দূৰত্ব বৰ্তাই ৰাখি বাগিচাৰ কাৰ্যালয়ৰ সন্মুখত এঘণ্টা ধৰ্ণা কাৰ্যসূচী ৰূপায়ণ কৰি বাগিচাৰ পৰিচালকৰ হাতত এখন স্মাৰক পত্ৰ প্ৰদান কৰিব। ১০ জুলাইত ৬ ঘণ্টীয়া এক অনশন কাৰ্যসূচী ৰূপায়ণ কৰিব বুলি অসম চাহ মজদুৰ সংঘৰ দ্বাৰা প্ৰেৰণ কৰা বিবৃতিটোত প্ৰকাশ।