সোণতলীৰ চৌধুৰীপামৰ আনোৱাৰ হুছেইনৰ জীৱনত ঘোৰ অমানিষা, অকালতে বিকল দুয়োটা চকু

সোণতলী : দক্ষিণ কামৰূপ জিলাৰ বকো বিধান সভা সমষ্টিৰ অন্তৰ্গত সোণতলী চৌধুৰীপাম গাঁৱৰ এগৰাকী অসহায় দৰিদ্ৰ পৰিয়ালৰ কৰুণ গাঁথা। পৰিয়ালৰ মুখ্য উপাৰ্জনকাৰী আনোৱাৰ হুছেইনে হঠাতেই দুটি চকুৰে নেদেখা হ’ল ৷ জন্মৰে পৰা এটা চকু বিকল হৈ আছিল যদিও কিছুদিন আগত দুয়োটা চকুৱেই বিকল হৈ পৰিল আনোৱাৰ হুছেইনৰ ৷ তাৰ পিছতে পৰিয়ালটোলৈ নামি আহিল ঘোৰ অমানিষা ৷ বৃদ্ধ মাতৃ, পত্নী আৰু দুটি কণমানি সন্তানকলৈ আনোৱাৰ হুছেইনে জীৱনৰ মধ্য বয়সতেই জীৱন যুদ্ধত পৰাজয়ৰ বাস্তৱ কাহিনীয়ে স্তম্ভিত কৰি তুলিছে সকলোকে। জীৱন যুদ্ধত হাৰ মনা পৰিয়ালটোৱে সম্প্ৰতি এসাজ খাই এসাজ নাখাই পাৰ কৰিব লগীয়া হৈছে দিনৰাতি। ঘৰৰ ভেটিৰ বাহিৰে খেতিবাতিৰ মাটি নথকা আনোৱাৰ হুছেইনে দিন হাজিৰা কৰি পৰিয়াল পোহপাল দিছিল মাতৃসহ পাঁচজনীয়া পৰিয়ালক। কিন্তু ৰুষ্ঠ নিয়তিয়ে মূহুৰ্তৰ ভিতৰতে পৰাজিত কৰিলে আনোৱাৰ হুছেইনক ৷ ৰাতি টোপনিৰ পৰা উঠিয়েই হঠাতে চকুত নেদেখা হৈ পৰিল আনোৱাৰ হুছেইনে ৷ এতিয়া চিকিৎসাৰ বাবে আনোৱাৰ হুছেইনৰ হাতত নাই এটা ফুটা কৰিও ৷ সেয়ে আপোনাৰ অকণমান সহায়ে আনোৱাৰ হুছেইনৰ পৰিয়ালে পাব পাৰে আৰ্থিক সকাহ৷ বকো সমষ্টিৰ বিধায়িকাৰ প্ৰত্যক্ষ হস্তক্ষেপ বিচাৰিছে স্থানীয় ৰাইজে ৷ স্বাস্থ্য মন্ত্ৰী হিমন্ত বিশ্ব শৰ্মা দেৱকো জনাইছে কাতৰ আহ্বান ৷ কোনো সদাশয় ব্যক্তিয়ে আনোৱাৰ হুছেইনৰ চিকিৎসাৰ বাবে সহায় আগবঢ়াব বিচাৰিলে ষ্টেট বেংকৰ একাউন্ট নম্বৰ ৩৩৫৬৯৪১৫২১১ আই এফ ছি কোড নম্বৰ এছ বি আই এন০০০৯৪৩৯ অথবা +৯১৬০০০১৫৯৯১২ অথবা নম্বৰত যোগাযোগ কৰিবলৈ পৰিয়ালৰ লোকে অনুৰোধ জনাইছে ৷