দৰঙৰ মহলীয়াপাৰা শ্ৰীমন্ত শঙ্কৰদেৱ বিদ্যালয়ৰ পৰা নৱম স্থান দখল কৰা ভৃগুমোহন কুমাৰৰ বিদ্যালয়ত উপস্থিত প্ৰাক্তন পদাধিকাৰ, উপ-পদাধিকাৰসহ প্ৰধান সম্পাদক বাবুল বৰা ।

জয়দেৱ ডেকা :

মহাপুৰুষ শ্ৰীমন্ত শঙ্কৰদেৱৰ নামেৰে শ্ৰীমন্ত শঙ্কৰদেৱ সঙ্ঘই অসমত ৫৬ খন বিদ্যালয় প্ৰতিষ্ঠা কৰি ছাত্ৰ-ছাত্ৰী সকলক শিক্ষাৰ দিশত আগবঢ়াই নিবলৈ যি চেষ্টা চলাই আহিছে তাৰ অংশ হিচাবে দৰঙৰ মহলীয়াপাৰাত ১৩ বিঘা মাটিত প্ৰতিষ্ঠা কৰা শ্ৰীমন্ত শঙ্কৰদেৱ বিদ্যালয়ৰ পৰা সদ্য ঘোষিত হাইস্কুল শিক্ষান্ত পৰীক্ষাত নৱম স্থানেৰে উৰ্ত্তীণ হ’ল ভৃগুমোহন কুমাৰ৷ শ্ৰীমন্ত শঙ্কৰদেৱ সঙ্ঘই দৰং জিলাত প্ৰথম স্থাপন কৰা এই বিদ্যালয়খনৰ ছাত্ৰ-ছাত্ৰীয়ে  প্ৰতিষ্ঠা কালৰে পৰা উৰ্ত্তীণ হৈ আহিছে ১০০ শতাংশ৷ সেয়ে শ্ৰীমন্ত শঙ্কৰদেৱ বিদ্যালয়ৰ পৰা অসমৰ শীৰ্ষ দহটা স্থানৰ ভিতৰত নৱম স্থান দখল কৰা ভৃগুমোহন কুমাৰ আৰু বৰমপুৰ জাতীয় বিদ্যালয়ৰ ছাত্ৰ ধৃতিৰাজ বাস্তৱ কলিতাক সম্বৰ্ধনা জনাবলৈ দৰঙত উপস্থিত হ’ল শ্ৰীমন্ত শঙ্কৰদেৱ সঙ্ঘৰ মুখ্য উপদেষ্টা ভৱেন্দ্ৰ নাথ ডেকা,  উপ-পদাধিকাৰ বসুন্ধৰ ডেকা আৰু সম্পাদক প্ৰধান বাবুল বৰা৷ শীৰ্ষ স্থানপ্ৰাপ্ত দুয়োগৰাকী ছাত্ৰক সম্বৰ্ধনা জনোৱাৰ উপৰিও সঙ্ঘই প্ৰতিষ্ঠা কৰা শ্ৰীমন্ত শঙ্কৰদেৱ বিদ্যালয়খনলৈ শ্ৰীমন্ত শঙ্কৰদেৱ সঙ্ঘই প্ৰতি বছৰে আগবঢ়াই অহা অনুদানৰ উপৰিও এই বৰ্ষত বিশেষ অনুদান আগবঢ়োৱাৰ কথা ঘোষণা কৰে শ্ৰীমন্ত শঙ্কৰদেৱ সঙ্ঘৰ প্ৰধান সম্পাদক বাবুল বৰাই৷ অনাগত দিনত এই বিদ্যালয়ৰ লগতে শ্ৰীমন্ত শঙ্কৰদেৱ সঙ্ঘই প্ৰতিষ্ঠা কৰা  সকলো কেইখন বিদ্যালয়ে আৰু অধিক ভাল ফলাফল দেখুৱাব পাৰিব বুলি আশা কৰাৰ লগতে মহলীয়াপাৰা শ্ৰীমন্ত শঙ্কৰদেৱ বিদ্যালয়ৰ প্ৰধান শিক্ষক তথা বিদ্যালয়ৰ সমুহ শিক্ষক কৰ্মচাৰীক শ্ৰীমন্ত শঙ্কৰদেৱ সঙ্ঘৰ তৰফৰ পৰা ধন্যবাদ জ্ঞাপন কৰে৷