বিস্ফোৰণৰ নৱম দিনলৈকে অনিয়ন্ত্ৰিত অৱস্থাত বাঘজান তৈলখাদ : জীৱন, সম্পত্তিৰ নিৰাপত্তা বিচাৰি পাঁচ শতাধিক জনতাৰ প্ৰতিবাদী সমদল ।
ডিৰাক সীমান্ত,
শ শ অসমীয়াৰ জন জীৱনকলৈ হেতালী খেলিছে অইল ইণ্ডিয়া কতৃপক্ষই ৷ চৰকাৰেও ভাও ধৰিছে চকুমুদা কুলিৰ ৷ যাৰ পৰিণতিত সকলো থাকিও বিগত ৯ টা দিনে জীৱনৰ মোহত আশ্ৰয় শিৱিৰত থকা শ শ ৰাইজে আজি প্ৰতিকুল বতৰকো নেউচি বাহিৰ কৰিলে প্ৰতিবাদী সমদল ৷ অনিশ্চয়তাত ভূগিছে ৰাইজ ৷ গতিকে প্ৰতিকুল বতৰকো নেওচি অইল ইণ্ডিয়াৰ বিৰুদ্ধে ওলাই আহিল প্ৰায় পাঁচ শতাধিক জনতা ৷ বাঘজানত ২৭ মাৰ্চৰ পূৱা বি জি আৰ ৫ নং তৈলখাদ বিস্ফোৰণ হোৱা আজি নৱম দিনটো অপৰিবৰ্তিত অৱস্থাত নিৰ্গমন হৈ আছে গেছ আৰু তেল ৷ বিপদাপন্ন হৈ পৰা জীৱকুল, মৎস্যকুল তথা জৈৱ-বৈচিত্ৰৰ ভাৰসাম্য ক্ৰমে শেষহৈ গৈছে ৷ আনহাতে আজিলৈকে বিস্ফোৰিত তেলখাদটো নিয়ন্ত্ৰণৰো কোনো বিশেষ ব্যৱস্থা লোৱা নাই অইল ইণ্ডিয়া নতুবা চৰকাৰে ৷ ইয়াৰ পৰিবৰ্তে কালি ডুমডুমা ৰাজহ চক্ৰ বিষয়াৰ কাৰ্যালয়ত অইল ইণ্ডিয়া, চৰকাৰ আৰু ৰাইজৰ মাজত হোৱা আলোচনাৰ সিদ্ধান্তসমূহ লিখিত প্ৰতিশ্ৰুতি হিচাপে ৰাইজে বিচৰাত তাক আজি দুপৰিয়ালৈকে ৰাইজ বা যুৱ সংঘৰ হাতত প্ৰদান নকৰাত ৰাইজ অসন্তুষ্ট হৈ প্ৰতিবাদত নামি পৰে ৷ ৰাইজৰ প্ৰতিবাদৰ ভাষা যদি অইল আৰু চৰকাৰে সময়ত বুজি নাপাই তেন্তে জনতাই বিস্ফোৰিত তেলখাদটোতে আত্মজাহ দিয়াৰ ভাবুকি প্ৰদান কৰিছে ৷ এনেদৰে পৰিৱৰ্তিতভাবে তেল সংমিশ্ৰিত গেছ নিৰ্গমন হৈ থাকিলে অনাগত দিনত অধিক জংগী আন্দোলন হ’ব সেয়া নিশ্চিত ৷
