বানাক্ৰান্তৰ কাষত বিধায়ক বলীন চেতিয়া : নদীত পৰি কৰুণ মৃত্যুক সাৱটি লোৱা জগত কোঁৱৰ পৰিয়াললৈ চাৰি লাখ টকা আৰ্থিক অনুদান ঘোষণা।

ডিৰাক সীমান্ত : বিগত কেইদিনমান পূৰ্বে নেৰানেপেৰাকৈ মুখলধাৰে দিয়া বৰষুণৰ বাঢ়নী পানীত অসম অৰুণাচল সীমান্তৱৰ্তী তিনিচুকীয়া জিলাৰ ১২৬ নং শদিয়া বিধানসভা সমষ্টিৰ কাকপথাৰ উন্নয়ন খণ্ডৰ অৰ্থাৎ ডিৰাক গাওঁ পঞ্চায়তৰ অন্তৰ্গত বৰডিৰাক আৰু ন-চোমণি গাঁও সংযোগী পথৰ  ডিৰাক নদীৰ ওপৰত থকা বাঁহৰ দলংখন উটুৱাই লৈ যায় । কেইবাদিনো যোগাযোগ বিচ্ছিন্ন হৈ থকাত গাঁওবাসীয়ে উপায়ন্তৰ হৈ শ্ৰমদানেৰে দলংখন পুনৰ নিৰ্মান কৰাৰ সিদ্ধান্ত লৈ যোৱা ৩ জুলাইত দলংখন নিৰ্মাণ কৰি থাকোতে নদীত পৰি কৰুণ মৃত্যুক সাৱটি লব লগা হৈছিল জগত কোঁৱৰ (৪৫) নামৰ ব্যক্তিজন । আজি ব্যক্তিজনৰ ঘৰত ১২৬ নং শদিয়া বিধান সভা সমষ্টিৰ বিধায়ক বলীন চেতিয়াই উপস্থিত হৈ ৰাজ্য চৰকাৰৰ তৰফৰ পৰা চাৰি লাখ টকাৰ আৰ্থিক অনুদান প্ৰদান আৰু কেন্দ্ৰীয় চৰকাৰলৈ সাহায্যৰ বাবে প্ৰস্তাৱ প্ৰেৰণ কৰাৰ কথা ঘোষণা কৰাৰ লগতে বাৰিষা অহাৰ লগে লগেই আঞ্চলবাসীৰ প্ৰধান সমস্যা এই দলংখন নিৰ্মাণ কৰাৰো প্ৰতিশ্ৰুতি প্ৰদান কৰে । অন্যহাতে বাঢ়নী পানীয়ে ভাঙি নিয়া ডিৰাক ৰংপুৰীয়া আৰু তৰাজনীয়া গাঁও সংযোগী পথত থকা কালভাৰ্টটো তেখেতৰ নিজা ধনেৰে নিৰ্মাণ কৰাৰ কথা অৱগত কৰে । অঞ্চলটোৰ ৰাইজে বিধায়কজনৰ এনে প্ৰদক্ষেপ শলাগ লৈছে ।