‘বিএআৰচি’য়ে তিনি মাহৰ বাবে নিষিদ্ধ কৰিলে টিভি চেনেলসমূহৰ সাপ্তাহিক ৰেটিং

ডিজিটেল ডেস্কঃ ৰেটিং এজেঞ্চি ব্ৰডকাষ্ট অডিঅ’ৰ ৰিচাৰ্চ কাউন্সিলয়ে আগন্তুক তিনি মাহৰ বাবে টিভি চেনেলসমূহৰ সাপ্তাহিক ৰেটিং নিষিদ্ধ কৰাৰ গুৰুত্বপূৰ্ণ সিদ্ধান্ত লৈছে। ফেক ৰেটিঙৰ অভিযোগৰ ওপৰত নিজৰ চিষ্টেম ভালদলে পৰ্যপেক্ষণ কৰি এক সিদ্ধান্তত উপনীত হ’ব নোৱাৰা পৰ্যন্ত বিএআৰচিয়ে সকলো বাতৰি চেনেলৰ বাবে পৃথক পৃথককৈ জাৰি কৰা সাপ্তাহিক ৰিপৰ্ট বন্ধ কৰিব জানিব পৰা গৈছে৷ ৰেটিঙৰ এই নতুন নিয়ম ইংৰাজী, হিন্দী, আঞ্চলিক ভাষা আৰু ব্যৱসায়িক নিউজ চেনেলৰ ক্ষেত্ৰত প্ৰযোজ্য হ’ব। মুম্বাই আৰক্ষীয়ে ৰিপাব্লিক টিভিৰ লগতে দুটা মাৰাঠী টেলিভিছন চেনেলৰ বিৰুদ্ধে ধনৰ বিনিময়ত টি আৰ পি মেনেজ কৰাৰ অভিযোগ উত্থাপিত কৰিছিল৷ ঘটনা সন্দৰ্ভত আৰক্ষীয়ে তদন্ত ঘোষণা কৰিছে৷