“সকলো ছাত্ৰ-ছাত্ৰীৰে এটা সপোন থাকিব লাগে আৰু সেই সপোনক বাস্তৱত ৰূপায়িত কৰিবলৈ হ’লে চেষ্টা কৰিব লাগিব আৰু তেতিয়াহে জীৱনত সফলতা আহিব ৷”— এই মন্তব্য অসম সন্তান তথা এন আই টি, দুৰ্গাপুৰৰ শিক্ষাবিদ হিমাংশু বৰুৱাৰ ।
বাক্সা জিলাৰ বৰমাস্থিত এম্পায়াৰ একাডেমিৰ বাৰ্ষিক অধিৱেশনৰ মুকলি সভা উদ্বোধন কৰি বৰুৱাই এইদৰে ব্যক্ত কৰি তেওঁ ছাত্ৰ-ছাত্ৰী সকলক সপোন পূৰণ নহোৱালৈকে চেষ্টা কৰি থকা উচিত বুলি কোৱাৰ লগতে সপোন বাস্তৱত ৰূপায়িত নহ’লে ছাত্ৰ-ছাত্ৰী সকলে কেতিয়াও হীনমন্যতাত ভূগিব নালাগে বুলি উল্লেখ কৰে । যেতিয়া এজন মানুহে নিজৰ প্ৰতি সন্তুষ্ট হয় তেতিয়া তেওঁ কেতিয়াও হীনমন্যতাত ভূগিব লগা নহয় বুলিও তেওঁ ভাষণ প্ৰসঙ্গত ব্যক্ত কৰে । সভাত আই আই টি, মুম্বাইৰ মহাকাশ অভিযন্তা অৰিণ্ডম বৰুৱাই মুখ্য অতিথি হিচাপে উপস্থিত থাকি একাদশ আৰু দ্বাদশ শ্ৰেণীৰ বৰ্ষ দুটা সকলো ছাত্ৰ-ছাত্ৰীৰ বাবে সন্ধিক্ষণ বুলি উল্লেখ কৰি কিবা এটা শিকিবলৈ হ’লে সাধনাৰ প্ৰয়োজন বুলি কয় ৷ সাধনা অবিহনে কোনেও একো শিকিব নোৱাৰে। গতিকে ছাত্ৰ-ছাত্ৰী সকলে এটা ভাল কেৰিয়াৰ লৈ নিজকে গঢ়ি তুলিবলৈ চেষ্টা কৰিব লাগে। অভ্যাস কৰিলেহে অসম্ভৱকো সম্ভব কৰিব পাৰি আৰু তেতিয়াহে ছাত্ৰ-ছাত্ৰী সকলে কৃতকাৰ্যতা লাভ কৰিব পাৰিব বুলিও তেওঁ কয় । সভাত কোকৰাঝাৰৰ বড়োলেণ্ড বিশ্ববিদ্যালয়ৰ ৰাজনীতি বিভাগৰ অধ্যাপক ড° জাহানীন মুছাহাৰীয়ে ছাত্ৰ-ছাত্ৰীক উদ্দেশ্যি দিয়া ভাষণত কয় যে উচ্চ শিখৰত উঠাৰ গুৰিতে বহু ব্যক্তিৰ সহযোগিতা জড়িত হৈ থাকে ৷ কাৰোবাৰ দুৰ্বলতাৰ সুযোগ লৈ আগবঢ়াতকৈ প্ৰতিযোগিতাৰ মনোভাৱেৰে আগবাঢ়িলেহে জীৱনত কৃতকাৰ্যতা পাব পাৰি বুলি ছাত্ৰ-ছাত্ৰীৰ আগত মুছাহাৰীয়ে অৱগত কৰে ৷ আজিৰ এই সভাতে এম্পায়াৰ একাডেমীৰ প্ৰাচীৰ পত্ৰিকা “আগান দা ষ্টেপ” উন্মোচন কৰে বৰমা ছোৱালী হাইস্কুলৰ প্ৰধান শিক্ষক দেওবাৰ ৰামছিয়াৰীয়ে ৷ একাডেমীখনৰ পৰিচালনা সমিতিৰ সভাপতি ৰজনী বৰজৌৱাৰীয়ে আঁত ধৰা অনুষ্ঠানটোত আদৰণী ভাষণ আগবঢ়ায় একাডেমিৰ প্ৰধান অধ্যক্ষ বিদ্যাসাগৰ ৰামছিয়াৰীয়ে ।