বৰপেটা শিক্ষা খণ্ডৰ নাৰ্চাৰী মণ্ডল সমল কেন্দ্ৰত “হ’বা তুমি বিজয়ীঃ এক প্ৰেৰণামূলক যাত্ৰা”…

সমগ্ৰ বৰপেটা জিলাৰ লগতে বৰপেটা শিক্ষা খণ্ডৰ অন্তৰ্গত ১১২২ নং নাৰ্চাৰী মণ্ডল সমল কেন্দ্ৰৰ সকলো বিদ্যালয়ৰ ছাত্ৰ-ছাত্ৰী আৰু শিক্ষক-শিক্ষয়িত্ৰীসকলৰ মাজত ৫৩৭ নং বামুনা প্ৰাথমিক বিদ্যালয়ত আজি বৰপেটা শিক্ষা বিভাগৰ উদ্ভাৱনীমূলক অনুষ্ঠান “হ’বা তুমি বিজয়ীঃ এক প্ৰেৰণামূলক যাত্ৰা” সকলো প্ৰতিযোগিতা তথা অনুষ্ঠান সফলভাৱে সমাপ্ত হয়। সমল কেন্দ্ৰটোৰ অন্তৰ্ভুক্ত ৭ খন বিদ্যালয়ৰ ছাত্ৰ-ছাত্ৰী সকলে বিভিন্ন খেল-ধেমালি, সাহিত্য আৰু সাংস্কৃতিক প্ৰতিযোগিতাত অংশগ্ৰহণ কৰে। ছাত্ৰ-ছাত্ৰী সকলৰ লগতে বিদ্যালয়ৰ শিক্ষক- শিক্ষয়িত্ৰী সকলৰ মাজতো সংগীত, একক অভিনয় আদি প্ৰতিযোগিতা অনুষ্ঠিত হয়। সাংস্কৃতিক প্ৰতিযোগিতাত বিচাৰক হিচাপে উপস্থিত থাকে বিশিষ্ট গায়িকা অপৰ্ণা দাস আৰু নৃত্য শিল্পী চন্দাস্মিতা দাস।

প্ৰতিযোগিতাৰ শেষত সকলো বিজয়ী প্ৰতিযোগীক বিদ্যালয় সমূহৰ পৰিদৰ্শক তথা জিলা প্ৰাথমিক শিক্ষা বিষয়া, খণ্ড প্ৰাথমিক শিক্ষা বিষয়া আৰু মণ্ডল সমল কেন্দ্ৰ সমন্বয়কৰ স্বাক্ষৰিত মানপত্ৰ আৰু বটাঁ প্ৰদান কৰা হয়। বঁটা প্ৰদান অনুষ্ঠানত বিশিষ্ট অতিথি হিচাপে উপস্থিত থাকে বৰপেটা শিক্ষা খণ্ডৰ খণ্ড প্ৰাথমিক শিক্ষা বিষয়া সমীন বৈশ্য, বৰপেটা শিক্ষা খণ্ডৰ সমল ব্যক্তি চন্দন কুমাৰ দাস আৰু প্ৰসেনজিৎ শৰ্মা। বিজয়ী প্ৰতিযোগী সকলক বঁটা বিতৰণ কৰি সমীন বৈশ্যই “হʼবা তুমি বিজয়ী” অনুষ্ঠানটো শিক্ষক আৰু ছাত্ৰ ছাত্ৰীসকলৰ মাজত থকা প্ৰতভাসমূহ বিকাশ হোৱাৰ এক সুন্দৰ পদক্ষেপ বুলি বক্তব্য ৰাখে। সভাৰ অন্তত জনপ্ৰিয় কণ্ঠশিল্পী তথা শিক্ষয়িত্ৰী অপৰ্ণা দাসে সংগীত পৰিৱেশন কৰি সকলোকে আপ্লুত কৰে। উল্লেখ্য যে বৰপেটা জিলা প্ৰশাসন আৰু বৰপেটা শিক্ষা বিভাগৰ উদ্যোগত শিক্ষক শিক্ষয়িত্ৰী আৰু ছাত্ৰ-ছাত্ৰীসকলৰ সুপ্ত প্ৰতিভাসমূহ বিকশিত কৰাৰ উদ্দেশ্যে তথা তেওঁলোকক সকলো দিশতে প্ৰেৰণা দিয়াৰ বাবে “হ’বা তুমি বিজয়ী : এক প্ৰেৰণামূলক যাত্ৰা” নামৰ এক উদ্ভাৱনীমূলক অনুষ্ঠান অনুষ্ঠিত হৈ আছে। অনুষ্ঠানটোৰ মূল পৰিকল্পনাকাৰী বৰপেটা জিলাৰ বিদ্যালয় সমূহৰ পৰিদৰ্শক তথা বৰপেটা জিলা প্ৰাথমিক শিক্ষা বিষয়া ৰাতুল কুমাৰ দাস।

ইতিমধ্যে যোৱা ১২ এপ্ৰিল তাৰিখৰ পৰাই সকলো বিদ্যালয়তে বিদ্যালয় পৰ্য্যায়ত “হ’বা তুমি বিজয়ী”ৰ বিভিন্ন প্ৰতিযোগিতা অনুষ্ঠিত কৰা হৈ গৈছে আৰু বিদ্যালয়সমূহৰ বিজয়ী প্ৰতিযোগী তথা ছাত্ৰ ছাত্ৰীসকলৰ মাজত নাৰ্চাৰী মণ্ডল সমল কেন্দ্ৰত আজি মণ্ডল পৰ্য্যায়ত কুইজ, বক্তৃতা, আবৃত্তি, নৃত্য, সংগীত, যোগ আৰু দৌৰ প্ৰতিযোগিতা অনুষ্ঠিত কৰা হয়। আনহাতে বিদ্যালয়সমূহৰ শিক্ষক-শিক্ষয়িত্ৰীসকলৰ মাজত শ্ৰেণীকোঠাত পাঠ্যপুথিৰ সৈতে সংগতি থকা FLN Meterial বা TLM ব্যৱহাৰ কৰি তৈয়াৰ কৰা Video ৰ প্ৰতিযোগিতা, সংগীত প্ৰতিযোগিতা, চিত্ৰনাট্যৰ প্ৰতিযোগিতা, একক অভিনয় প্ৰতিযোগিতা আদি অনুষ্ঠিত কৰা হয়। আজিৰ প্ৰতিযোগিতাৰ বিজয়ী ছাত্ৰ ছাত্ৰী তথা শিক্ষক শিক্ষয়িত্ৰীসকলে অহা ৩০ এপ্ৰিলৰ পৰা খণ্ড পৰ্য্যায়ত অনুষ্ঠিত হ’বলগীয়া প্ৰতিযোগিতাসমূহত অংশগ্ৰহণ কৰিব আৰু খণ্ড পৰ্য্যায়ৰ বিজয়ী প্ৰতিযোগীসকলে জিলা পৰ্য্যায়ত অনুষ্ঠিত হ’বলগীয়া “হ’বা তুমি বিজয়ী”ৰ প্ৰতিযোগিতাসমূহত অংশগ্ৰহণ কৰিব।