পথৰ দাঁতিত শ্ৰমৰ মৰ্যাদাৰে জীৱন সংগ্ৰামত নামি পৰিছে শিক্ষিত যুৱক বিশ্বজিৎ ,মৃদুলে

নগাঁও

লকডাউনে  চাৰিওফালে জুৰুলা কৰাৰ সময়তে ৰাজ্যত প্ৰকাশ পাইছে কৰ্মসংস্কৃতিৰ এখনৰ পিছত আন এখন ছৱি ৷ কৰ্ম সংস্কৃতিৰ আন  এক নিদৰ্শন  দেখা পোৱা গ’ল নগাঁও চহৰত ৷ ডিঙিত অসমীয়াৰ স্বাভিমান গামোচা। হাতত দগা-পাল্লা । লাজ নহয়,হাতে-কামে দেখুৱাইছে অসমীয়াগিৰী৷ নগাওঁ চহৰৰ লক্ষীনগৰ চাৰিআলিৰ সমীপৰ পদপথত শাক-পাচলি লৈ বহিল এগৰাকী শিক্ষিত অসমীয়া যুৱক ৷ যুৱক জনৰ নাম বিশ্বজিৎ শইকীয়া ৷ ঘৰ নগাঁৱৰ পুৰণিগুদামত ৷ গাড়ীৰ ব্যৱসায়ত জড়িত বিশ্বজিৎ লকডাউনৰ ফলত একপ্ৰকাৰ জুৰুলা হৈ পৰিছিল ৷ বন্ধ হৈ পৰিল উপাৰ্জনৰ পথ৷কিন্তু হতাশ নহ’ল বিশ্বজিৎ ৷ ডিঙিত গামোচা লৈ বিগত এসপ্তাহৰ পৰা পদপথত আৰম্ভ কৰিছে শাক-পাচলিৰ খুচুৰা ব্যৱসায়।গ্ৰামাঞ্চলৰ পৰা শাক-পাচলি কিনি আনি বিশ্বজিতে বিক্ৰী কৰে নগাঁও চহৰত ৷  বিশ্বজিতে মুখত হাঁহি আৰু আত্মবিশ্বাসেৰে পদ পথৰ দাঁতিত নিজৰ ব্যৱসায় চলাই গৈছে। ৷ স্থানীয় লোকৰ পৰাও আশানুৰূপ সঁহাৰি লাভ কৰিছে  বিশ্বজিতে ৷ অসমীয়া যুৱকক উদ্যমেৰে কাম কৰিবলৈ ওলাই আহিবলৈও আহ্বান জনালে বিশ্বজিতে ৷আনহাতে নগাঁও চহৰৰ ফৌজদাৰী পট্টিৰ পদপথটো স্নাতক ডিগ্ৰীধাৰী মৃদুল নামৰ এজন যুৱকে নিজ ঘৰৰ সমীপতে আৰম্ভ কৰিছে পাচলি ব্যৱসায়। । লকডাউনৰ ফলত কৰ্মহীন হৈ পৰা মৃদুলে এতিয়া পাচলি বিক্ৰী কৰা ধনেৰেই পৰিয়াল পোহপাল দিয়াৰ উপৰিও উলিয়াইছে নিজৰ খৰচ।এই ব্যৱসায় কৰি অত্যন্ত সুখী হোৱা মৃদুলে সাংবাদিকৰ সৈতে হোৱা বাৰ্তালাপত কয় যে অঞ্চলবাসীয়ে এতিয়া মোলৈ বাট চাই থাকে যে মই কেতিয়া আহোঁ পাচলি লৈ ৷ মৃদুলেও শিক্ষিত যুৱক যুৱতীক আহ্বান জনালে শ্ৰম কৰি আগবাঢ়ি যাবলৈ৷