১১-১২ মে’ত গোগামুখ আঞ্চলিক ছাত্ৰ সন্থাৰ উদ্যোগত কেন্দ্ৰীয় ব’হাগী বিদায় উৎসৱঃ চহা শিল্পী চক্ৰপতি দেউৰীলৈ শিল্পী অই আপ্পুন গণেশ পেগু বঁটা…
গোগামুখ আঞ্চলিক ছাত্ৰ সন্থাৰ উদ্যোগত ৪০ সংখ্যক গোগামুখ কেন্দ্ৰীয় ব’হাগী বিদায় উৎসৱটি ১১ আৰু ১২ মে’ত দুদিনীয়ৰ বৰ্ণিল কাৰ্যসূচীৰে অনুষ্ঠিত হ’ব ৷ ধেমাজি জিলাৰ গোগামুখ নগৰ উচ্চ মাধ্যমিক বিদ্যালয়ৰ প্ৰাংগনত অনুষ্ঠিত হ’ব লগা উক্ত ব’হাগী বিদায় উৎসৱ সাফল্যমণ্ডিত কৰি তুলিবলৈ ইতিমধ্যে শক্তিশালী উদ্যাপন সমিতি গঠন কৰা হৈছে ৷ এইমতে ড° ৰূপেশ্বৰ চেতিয়াক সভাপতি, ড° সুৰজিৎ দলেক কাৰ্যকৰী সভাপতি, ঋতুপৰ্ণ কোঁচক সম্পাদক হিচাপে দায়িত্ব দিয়া হৈছে ৷ উদযাপন সমিতি আৰু গোগামুখ আঞ্চলিক ছাত্ৰ সন্হাৰ সভাপতি দিগন্ত বৰুৱা আৰু সম্পাদক ৰাহুল দেউৰীয়ে জনোৱা মতে গোগামুখ আঞ্চলিক ছাত্ৰ সন্হাই প্ৰতি বছৰে প্ৰদান কৰি অহা বৰেণ্য শিল্পী-সাহিত্যিক, সমাজ সংগঠক শিল্পী অই আপ্পুন গণেশ পেগু বঁটা এইবাৰ প্ৰদান কৰা হ’ব চহা শিল্পী তথা দেউৰী সমাজৰ পুৰুধা ব্যক্তি চক্ৰপতি দেউৰীক ৷ চক্ৰপতি দেউৰী হৈছে দেউৰী সমাজৰ লোকগীত আৰু লোকসংস্কৃতিৰ সাধক আৰু পথ প্ৰদৰ্শক তথা দেউৰী সমাজৰ প্ৰথমগৰাকী সংগীতশিল্পী ৷ তেওঁ দেউৰী সমাজৰ প্ৰথমখন বোলছবি ‘চ্চেকুঁ নুৱামাৰ’ গীতিকাৰ-সুৰকাৰ আৰু কণ্ঠশিল্পী আছিল ৷
বহু দেউৰী গীতৰ স্ৰষ্টা চক্ৰপতি দেউৰী নিজাববীয়াকৈ ববীয়াকৈয়ো বহু দেউৰী গীত ৰচনা কৰি অসমৰ চুকে-কোনে পৰিৱেশন কৰাৰ লগতে অডিঅ’ৰ যোগেদিও বাণিবদ্ধ কৰিছে ৷ বিশ্ববৰেণ্য শিল্পী ড° ভূপেন হাজৰিকাৰ মিৰি-জীয়ৰি বোলছবিখনত অই আপ্পুন গণেশ পেগু আৰু চক্ৰপতি দেউৰীয়ে একেলগে অভিনয় কৰিছিল ৷ হাবি-জংঘলেৰে আবৃত তেতিয়াৰ সোৱণশিৰি নদীৰ পাৰৰ বিভিন্ন জাতি-জনগোষ্ঠীৰ মাজত ড° হাজৰিকাক গণেশ পেগু আৰু চক্ৰ দেউৰীয়ে অতিকৈ ওচৰ চপাই নিছিল তিনিওগৰাকীয়ে সোৱণশিৰি নৈৰ নৈসৰ্গিক দৃশ্য বহুদিন ধৰি উপভোগ কৰি ঘুনাসূঁতিৰ জংকি-পানৈক গীতেৰে-সুৰেৰে আৱিষ্কাৰ কৰিছিল ৷ দেউৰী সমাজৰ এইগৰাকী পুৰুধা ব্যক্তি চক্ৰপতি দেউৰীৰ জন্ম হৈছে লখিমপুৰ জিলাৰ নাৰায়ণপুৰৰ কিনাপথাৰ দেউৰী গাঁৱত ৷ সৰুৰে পৰা গীত গাই, সংগীত চৰ্চ্চা কৰি ভালপোৱা আৰু অগনণ জনতাক গীতৰ মাদকতা বিলাই ফুৰা চক্ৰপতি দেউৰীৰ জীৱন সংগ্ৰাম কিন্তু বৰ সুখদায়ক নহয় ৷ সম্ভাৱনাময় মেধা শক্তি থাকিও কেৱল আৰ্থিক অনাটনৰ বাবে হাইস্কুল শিক্ষান্ত পৰীক্ষাটো অবতীৰ্ণ হ’ব নোৱাৰিলে তেওঁ ৷
সম্প্ৰতি ৬২ বছৰ গৰকা চক্ৰপতি দেউৰীৰ থাকিবলৈ নাই উপযুক্ত ঘৰ, সংগীত চৰ্চা অব্যাহত ৰাখিবলৈ নাই কোনো সুবিধা ৷ আৰ্থিক অনাটনে জুৰুলা কৰা চক্ৰপতি দেউৰী সম্প্ৰতি জীৱন যুদ্ধত দিশহাৰা ৷ চৰকাৰী কোনো সা-সুবিধাই তেওঁ লাভ কৰা নাই ৷ দেউৰী স্বায়ত্তশাসিত পৰিষদৰ পৰাও তেওঁ ফুটা কড়ি এটাও লাভ কৰা নাই ৷ এনে এজন অভাবগ্ৰস্ত শিল্পীক ছাত্ৰ সন্হাই অই আপ্পুন শিল্পী বঁটা প্ৰদান কৰাত স্বাভাৱিকতে দেউৰী সমাজৰ লগতে গোগামুখবাসী উৎফুলিত হৈ পৰিছে ৷ উল্লেখনীয় যে, ১২ মে’ত অই আপ্পুন শিল্পী গণেশ পেগু বঁটা চক্ৰপতি দেউৰীক প্ৰদান কৰা হ’ব ৷ এই বঁটাত আছে নগদ ধন, ফুলাম গামোচা, চেলেং চাদৰ, শৰাই, ৰিঃবি গাছেং, মিবু গালুগ, মিচিং মাফলাৰ, প্ৰশংসা পত্ৰ আদি ৷ উদযাপন সমিতিয়ে জনোৱা মতে ব’হাগী বিদায় উৎসৱত পূৰ্বৰ দৰে বৰ বিহুৱতী, সৰু বিহুৱতী, টকা বিহু, জেং বিহু, হুচৰি বিহু প্ৰতিযোগিতা অনুষ্ঠিত হোৱাৰ লগতে ৰচনা, টেকেলিভঙা, ৰচী টনা, পিতা-পনা বনোৱা প্ৰতিযোগিতাও অনুষ্ঠিত হ’ব ৷