মুখ্যমন্ত্ৰী সৰ্বানন্দ-বিত্তমন্ত্ৰী হিমন্ত বিশ্বৰ সেউজ সংকেত : দিছপুৰত জয়ন্ত দাসে পাব বিজেপিৰ টিকট !

গুৱাহাটী

ৰাজ্যৰ বিধান সভা নিৰ্বাচনলৈ মাজত আছে দহটা মাহ। সম্প্ৰতি ক’ৰ’ণা ভাইৰাছ আৰু লকডাউনৰ বাবে সামাজিক কাম-কাজ এক প্ৰকাৰ বন্ধ হৈ আছে। কিন্তু ৰাজনৈতিক কাম-কাজ তথা পৰিকল্পনা পূৰ্ণগতিত আগবঢ়াই নিছে শাসকীয় বিজেপি দলে। আগন্তুক নিৰ্বাচনৰ বাবে বিধায়কসকলৰ পৰা ৰিপোৰ্ট কাৰ্ড বিচাৰি দলৰ ৰাজ্যিক সভাপতিয়ে নিৰ্দেশনা জাৰি কৰিছে। সকলো বিধায়কৰ লগতে মন্ত্ৰী তথা মুখ্যমন্ত্ৰীয়েও সমষ্টিৰ উন্নয়ন তথা কাম-কাজৰ খতিয়ান সম্বলিত ৰিপোৰ্ট কাৰ্ড দাখিল কৰাতো বাধ্যতামূলক। এই সময়তে বহুতো বিধায়কে দলৰ টিকট নোপোৱাটো ব্যাপকভাৱে চৰ্চিত হৈ আছে। ইয়াৰ মাজতে আলোচনালৈ আহিছে ৰাজধানী দিছপুৰ সমষ্টিৰ প্ৰসংগ। অগপৰ প্ৰাক্তন নেতা তথা বিজেপিলৈ আহি দলীয় টিকটৰ জৰিয়তে বিধায়ক হোৱা অতুল বৰাৰ কাম-কাজে দলৰ নেতৃত্বক বহু সময়ত বিমূৰত পেলাইছে। নিৰ্বাচনত সৰ্বাধিক ভোটত বিজয়ী হোৱাৰ বাবেই মন্ত্ৰিত্ব দাবী কৰি এসময়ত নেতৃত্বক অতিষ্ঠ কৰিছিল। মাজে মাজে চৰকাৰ আৰু দলৰ সিদ্ধান্তৰ বিৰুদ্ধে সংবাদমেল পাতি অগপৰ প্ৰাক্তন মন্ত্ৰীজনে ক্ষোভ উজাৰিছে। নাগৰিকত্ব সংশোধনী আইন অৰ্থাৎ ‘কা’ সমৰ্থন নকৰে বুলি স্পষ্ট ভাষাৰে ব্যক্ত কৰিছে। সেয়েহে অতুল বৰাই দলীয় নেতৃত্বৰ পৰা আগন্তুক সময়ত সমৰ্থন লাভৰ আশা একেবাৰে শূন্য। ইয়াৰ বিপৰীতে বিজেপি যুৱ মৰ্চাৰ প্ৰাক্তন সভাপতি তথা দলৰ মুখপাত্ৰ জয়ন্ত দাসে পূৰ্ণদ্যমে সমষ্টিত নামি গৈছে। এই ক্ষেত্ৰত মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী হিমন্ত বিশ্ব শৰ্মাই জয়ন্ত দাসক আগন্তুক নিৰ্বাচনত বিজেপিৰ দলীয় প্ৰাৰ্থিত্ব প্ৰদান কৰাৰ প্ৰতিশ্ৰুতি দিয়া বুলি জানিব পৰা গৈছে। কিছুদিনৰ পূৰ্বে স্বয়ং মুখ্যমন্ত্ৰীয়ে দিছপুৰত প্ৰতিদ্বন্দ্বিতা কৰাৰ সিদ্ধান্ত লোৱা বুলি প্ৰকাশ। কিন্তু মুখ্যমন্ত্ৰীয়ে এই সিদ্ধান্ত সলনি কৰিছে। ইয়াৰ বিপৰীতে জয়ন্ত দাসক প্ৰক্ষেপ কৰিছে অতুল বৰাৰ স্থানত।