ডিমৌত মুখ্যমন্ত্ৰী সৰ্বানন্দ সোণোৱাল

ডিমৌ

ডিমৌত মুখ্যমন্ত্ৰী সৰ্বানন্দ সোণোৱাল দেওবাৰে উপস্থিত হয়৷ মুখ্যমন্ত্ৰী সোণোৱাল ইয়াত উপস্থিত হৈ পৰিদৰ্শন কৰে ডিমৌৰ  বৰুৱাচাংমাই গাঁওস্থিত শিৱসাগৰ কাৰিকৰী বিদ্যালয়স্থিত কোৱাৰেণ্টাইন কেন্দ্ৰ। লক্ষণীয় যে মুম্বাই, চেন্নাই, কেৰেলা, বাংগালুৰু, দিল্লী আদি বহিঃৰাজ্যৰ পৰা অহা ৭৩ গৰাকী লোক এই কেন্দ্ৰত কোৱাৰেণ্টাইন হৈ আছে। ডিব্ৰুগড়ৰ নিজা বাসগৃহৰ পৰা পোনে পোনে ডিমৌৰ এই কোৱাৰেণ্টাইন কেন্দ্ৰত উপস্থিত হৈ ক’ৰোনা যুদ্ধৰ প্ৰকৃত যোদ্ধা চিকিৎসক আৰু চিকিৎসাকৰ্মীসকলৰ সৈতে মত বিনিময় কৰে। মুখ্যমন্ত্ৰীগৰাকীয়ে সংবাদ মাধ্যমৰ আগত কয় যে “আগন্তুক দিনবোৰ আমি ক’ৰোনা বিৰুদ্ধে যুদ্ধৰ বাবে সাজু হ’ব লাগিব৷ সন্মুখত অহা সমস্যাসমূহক প্ৰত্যাহ্বান হিচাপে গ্ৰহণ কৰিব লাগিব।” তেওঁ আনুষ্ঠানিক কোৱাৰেণ্টাইন আৰু হোম কোৱাৰেণ্টাইনত থকা লোকসকলকো ধৈৰ্য সহকাৰে ক’ৰোনা বিৰোধী যুদ্ধত সহায় আগবঢ়াবলৈ আহ্বান জনায়। তদুপৰি সাংবাদিকৰ এক প্ৰশ্নৰ উত্তৰত কোৱাৰেণ্টাইন কেন্দ্ৰত থকা একাংশ আৱাসীয়ে বিগত দিনকেইটাত কৰা কেতবোৰ উদ্ভণ্ডালি সম্পৰ্কত মুখ্যমন্ত্ৰীগৰাকীয়ে এইসকলৰ বিৰুদ্ধে আইনী ব্যৱস্থা গ্ৰহণ কৰিবলৈ বাধ্য হ’ব বুলি মন্তব্য কৰে। মুখ্যমন্ত্ৰীৰ লগত সাংসদ তপন গগৈ, মন্ত্ৰী যোগেন মহন, মৰাণৰ বিধায়ক চক্ৰধৰ গগৈ, থাওৰাৰ বিধায়ক কুশল দুৱৰী, সোণাৰীৰ বিধায়ক নৱনীতা সন্দিকৈ আদি মন্ত্ৰী-বিধায়কসকল উপস্থিত থাকে।