নিৰ্বাচনৰ দিন চমূ চাপি অহাৰ লগে লগে ৰাজ্যৰ বিভিন্ন প্ৰান্তত অবিৰত যাত্ৰা অব্যাহত ৰাখিছে মূখ্য মন্ত্ৰী, চৰকাৰে কৰা উন্নয়নমূলক কাম সমূহৰ আনুষ্ঠানিকভাৱে শুভ উদ্বোধন কৰাত ব্যস্ত হৈ পৰিছে তেওঁ। দেওবাৰে হোজাইত কেইবাটাও চৰকাৰী তথা দলীয় কাৰ্যসূচী লৈ উপস্থিত হয় মুখ্যমন্ত্ৰী সৰ্বানন্দ সোণোৱাল। পোনপ্ৰথমতে দিনৰ প্ৰায় ১:১০ বজাত বিহুতলী ৰাজহুৱা খেলপথাৰত অৱতৰণ কৰে মুখ্যমন্ত্ৰীৰ হেলিকপ্টাৰ।
ইয়াৰ পৰা পোনে পোনে ৰাওনা হয় শিলিগুৰি বস্তিৰ শ্রীশ্রী বৃদ্ধপ্ৰভু আশ্রমত অনুষ্ঠিত হোৱা দলীয় পৃষ্ঠাপ্ৰমুখ সন্মিলনত। সৰ্বপ্ৰথমে উক্ত স্থানত চলি থকা পঞ্চায়ত মেলাৰ প্ৰদৰ্শনীমূলক বিপণীসমূহ পৰিদৰ্শন কৰে। ইয়াৰ পিছত কেবাটাও উন্নয়নমূলক কামৰ আনুষ্ঠানিকভাৱে শুভ উদ্বোধন কৰে সৰ্বানন্দ সোনোৱালে।
অসম চৰকাৰৰ মৈত্ৰী আঁচনিৰ অধীনত নিৰ্মান সম্পন্ন হোৱা হোজাই আৰক্ষী থানাৰ নৱনিৰ্মিতি ভৱনৰ শুভ উদ্বোধন কৰাৰ লগতে ভাৰ্চুৱেল পদ্ধতিৰে পশ্চিম কাৰ্বিআংলং জিলাৰ হামৰেন থানা, যোৰহাটৰ পুলিবৰ আৰক্ষী থানা আৰু চৰাইদেও জিলাৰ সুনাৰী আৰক্ষী থানা উদ্বোধন কৰে।
এই উপলক্ষে আয়োজিত সভাত ভাষণ প্ৰদান কৰি মূখ্য মন্ত্ৰীয়ে কয় যে আৰক্ষী থানাৰ আন্তঃগাথঁনি উন্নয়নকে ধৰি আৰক্ষী বাহিনী শক্তিশালী কৰণৰ বাবে ৰাজ্য চৰকাৰে গ্ৰহণ কৰা পদক্ষেপৰ বাবে অসম আৰক্ষী আজি উল্লেখযোগ্য সফলতা দেখুৱাবলৈ সক্ষম হৈছে। ভাষণত আৰক্ষীক জনসাধাৰনৰ সেৱা আগবঢ়াবলৈ আহ্বান জনায়। নিজৰ ভাষণ প্ৰসংগত বিধায়ক শিলাদিত্যই সমষ্টিত বহু উন্নয়ন সাধন কৰিবলৈ সক্ষম হৈছে বুলি কোৱাৰ লগতে তেওঁক আৰ্শীবাদ প্ৰদাণ কৰি যাবলৈ আহ্বান জনায়।
অনুষ্ঠানত অসম আৰক্ষীৰ সঞ্চালক প্ৰধান ভাস্কৰজ্যোতি মহন্তই আদৰণি ভাষণ প্ৰদান কৰা উক্ত সভাত স্থানীয় বিধায়ক দ্বয় ক্ৰমে শিলাদিত্য দেৱ আৰু শিবু মিশ্র, অসম পৰ্য্যটন উন্নয়ন নিগমৰ অধক্ষ্য জয়ন্ত মল্ল বৰুৱা, অসম আৰক্ষীৰ গৃহ নিৰ্মান নিগমৰ পৰিচালন সঞ্চালক অৰবিন্দ কলিতা, হোজাই জিলাৰ উপায়ুক্ত, আৰক্ষী অধীক্ষককে ধৰি শীৰ্ষ বিষয়া সকল উপস্থিত আছিল।
পৰৱৰ্তী সময়ত ৰবীন্দ্ৰনাথ ঠাকুৰ বিশ্ববিদ্যালয়ত উপস্থিত হৈ বিশ্ববিদ্যালয়ৰ কলা ভৱন নিৰ্মাণৰ আধাৰশিলা স্থাপন কৰাৰ ওপৰিও নেতাজী সুভাষ চন্দ্ৰ বসুৰ নামেৰে নামাকৰণ কৰা ইণ্ড’ৰ ষ্টেডিয়াম আৰু নীলবাগান – হোজাই সংযোগী পথটি ৰাইজৰ বাবে উচৰ্গা কৰে।
শেষৰ কাৰ্য্যসূচীত মুখ্যমন্ত্ৰীৰ হৈ হোজাই সমষ্টিৰ বিধায়ক শিলাদিত্য দেৱ আৰু লামডিং সমষ্টিৰ শিবু মিশ্ৰই যৌথ ভাবে জোৰাপুখুৰী – হোজাই সংযোগী পথৰ শুভ উদ্বোধন কৰাৰ লগতে ভূমি সংৰক্ষণ বিভাগৰ এক প্ৰকল্পৰও আধাৰশিলা স্থাপন কৰে।
মূখ্যমন্ত্ৰী ভ্ৰমনৰ বাবে হোজাইত আৰক্ষীৰ কতকতীয়া নিৰাপত্তা বেষ্টনী গঢ়োতোলা হৈছিল। দলীয় কাৰ্য্যকৰ্তাসকলে নিজৰ প্ৰিয় মূখ্য মন্ত্ৰীক কাষৰ পৰা চাবলৈ অসংখ্য লোক শিলিগুৰি বস্তিৰ উক্ত পৃষ্ঠা প্ৰমূখ সন্মিলনত ভিৰ কৰা পৰিলক্ষীত হয়।