আধাৰ কাৰ্ড বনোৱাৰ নামত চলি থকা দুৰ্নীতি অতিশীঘ্রে বন্ধ কৰিব লাগে

✍ চন্দন কুমাৰ নাথ

যিহেতু প্রধানমন্ত্রী নৰেন্দ্ৰ মোদী ডাঙৰীয়াই দেশৰ সকলো নাগৰিকক নিজৰ নিজৰ নাম আধাৰ কাৰ্ডৰ লগত সংলগ্ন কৰিবলৈ আদেশ জাৰি কৰিছিল আৰু এই আদেশ মৰ্মে দেশৰ লগতে অসমতো আধাৰ কাৰ্ড বনোৱা কাম আৰম্ভ ইতিমধ্যে হৈছে। কিন্তু এতিয়া প্রশ্নটো হ’ল যে ৰাজ্যত বৰ্তমান কিছুমান অঞ্চলত আধাৰ কাৰ্ড বনোৱা নিৰ্দিষ্ট কেন্দ্রত সাধাৰণ জনতাৰ পৰা উৎকোচ লোৱা কাৰ্য্য একাংশ অসাধু কৰ্মচাৰীয়ে আৰম্ভ কৰিছে আৰু যাৰ ফলত এতিয়া একো একোজন আধাৰ কাৰ্ড বনাবলৈ অহা সাধাৰণ জনতাৰ পৰা ১০০ ৰ পৰা ২,০০০ টকালৈ দাবী কৰিছে। প্রাপ্ত খৱৰ অনুসৰি যিসকল সচেতন নাগৰিকে আধাৰ কাৰ্ড বনোৱাৰ নামত ধন দিব নিবিচাৰে তেওঁলোকৰ আধাৰ কাৰ্ডৰ আবেদন পত্রখন বহিষ্কাৰ কৰি দিয়া হয় আৰু যাৰ ফলত একোজন সাধাৰণ জনতাই আধাৰ কাৰ্ড বনোৱাৰ বাবে ৬-৮ মাহ আধাৰ কাৰ্ড বনোৱা কেন্দ্রৰ দুৱাৰলৈ আহি থাকিবলগীয়া অবস্থাৰ সৃষ্টি হয়। কিন্তু যি সময়ত টেলিভিশনৰ পৰ্দাত বা কেন্দ্রীয় চৰকাৰৰ জাননীত প্ৰকাশ কৰা তথ্য অনুসৰি আধাৰ কাৰ্ড বনাবলৈ ১ টকাও দিব নালাগে বুলি সদৰি কৰিছে, ঠিক তেনে সময়ত ৰাজ্যত যি বৰ্তমানলৈকে অব্যাহত হৈ থকা আধাৰ কাৰ্ড বনোৱাৰ নামত পইচা লোৱা কাৰ্য্যৰ বিষয়ে আমাৰ ৰাজ্য চৰকাৰৰ অধীনত থকা বিষয়ববীয়াসকলে জ্ঞাত নে সেয়া হৈছে আজিৰ তাৰিখত এক ধৰণৰ কোটি টকীয়া প্রশ্ন ? ৰাজ্যত আধাৰ কাৰ্ড বনোৱাৰ নামত চলি থকা উৎকোচ লোৱা কাৰ্য্যৰ আমি তীব্র বিৰোধিতা কৰিছো আৰু লগতে দাবী কৰিছো যে ৰাজ্যত আধাৰ কাৰ্ড বনোৱাৰ নামত পইচা লোৱা কাৰ্য্যৰ বিৰুদ্ধে অতিশীঘ্রে অসম চৰকাৰে কিবা বিহীত ব্যবস্থা গ্রহণ কৰক নহ’লে সাধাৰণ জনতাৰ পৰা আধাৰ কাৰ্ডৰ নামত উৎকোচ লোৱা কাৰ্য্য চলিয়েই থাকিব তাত কোনো সন্দেহ নাই।