সোণতলীৰ বৰঘোল আঞ্চলিক বাগান বজাৰ ক্লাৱৰ ঈদৰ সামগ্ৰী বিতৰণ

সোণতলী : সমগ্ৰ বিশ্বৰ লগতে অসমতো ১ আগষ্টত উদযাপন হ’ব ইছলাম ধৰ্মাৱলম্বী লোকসকলৰ পৱিত্ৰ উৎসৱ ঈদ-উল-আজহা৷ কৰোনা আতংকৰ মাজতে প্ৰশাসনৰ নিৰ্দেশ অনুসৰি ৰাজ্যবাসীয়ে ঘৰতে সামাজিক দূৰত্ব বজাই ৰাখি ঈদৰ নামাজ আদায় কৰাৰ প্ৰস্তুতি সম্পন্ন কৰা দেখা গৈছে৷ উল্লেখ্য যে, ৰাজ্যত ইতিমধ্য তিনিবাৰকৈ হৈ যোৱা বানপানীয়ে দক্ষিণ কামৰূপৰ সোণতলীৰ নৈপৰীয়া ৰাইজৰ মাজত হাহাকাৰ পৰিস্তিতিৰ সৃষ্টি হৈছে৷ বান আৰু খহনীয়াই আপোন ঘৰখন হেৰুৱাই মথাউৰি অথবা পথৰ দাঁতিত ভোকে লগোণে দিন পাৰ কৰিবলগীয়া হৈছে সোণতলীৰ নৈপৰীয়া ৰাইজে৷ ইপিনে ইছলাম ধৰ্মাৱলম্বী লোকৰ পৱিত্ৰ উৎসৱ ঈদ চাপি অহাৰ লগে লগে খহনীয়াগ্ৰস্থ দুখীয়া পৰিয়ালৰ মাজত হাহাকাৰ পৰিস্থিতি সৃষ্টি হৈছে৷ ইয়াৰ মাজতে সোণতলী অঞ্চলৰ স্বেচ্চাসেৱী সংগঠন বৰঘোল আঞ্চলিক বাগান বজাৰ ক্লাবে ব্যতিক্ৰমী পদক্ষেপ গ্ৰহণ কৰা  পৰিলক্ষিত হৈছে ৷ বৰঘোল আঞ্চলিক বাগান বজাৰ ক্লাৱৰ উদ্যোগত এটি সজাতি দলে বানে ঘৰ-বাৰী উটুৱাই নিয়া দুখীয়া পৰিয়ালৰ মাজত ঈদৰ সামগ্ৰী বিতৰণ কৰে৷ ক্লাৱৰ সভাপতি জাহিদুল ইছলামৰ নেতৃত্বত প্ৰায় ৩৫ ঘৰ পৰিয়ালৰ মাজত চেনি, সেৱাই, গাখীৰ, কিচমিচ, বাদাম, মিঠাতেল, চাবোন আদি বিতৰণ কৰে৷ স্মৰ্তব্য যে, বৰঘোল আঞ্চলিক বাগান বজাৰ ক্লাৱৰ বিষয়-ববীয়াসকলে  চৰকাৰী নিৰ্দেশনা অনুযায়ী পৱিত্ৰ ঈদৰ নামাজ ঘৰতে আদায় কৰিবলৈ আহ্বান জনাইছে৷ ক্লাৱখনৰ এনে মহানুভৱতাক স্থানীয় সচেতন মহেল ভূয়সী প্ৰশংসা কৰে ৷