ৰাজহ বিভাগৰ উদ্যোগত ঢকুৱাখনাত দুই ৰাজহ চক্ৰৰ ১১০ জন চৰকাৰী গাঁওবুঢ়াক স্মাৰ্ট ফোন বিতৰণ
ঢকুৱাখনা : ঢকুৱাখনা মহকুমাৰ সোৱণশিৰী ৰাজহ চক্ৰ আৰু ঢকুৱাখনা ৰাজহ চক্ৰৰ দুই চক্ৰ বিষয়াৰ কাৰ্যালয়ত আজি আয়োজিত সুকীয়া সুকীয়া অনুষ্ঠানত ঢকুৱাখনা ৰাজহ চক্ৰ আৰু সোৱণশিৰী ৰাজহ চক্ৰৰ অন্তৰ্গত বিভিন্ন লাটৰ মুঠ ১১০ গৰাকী চৰকাৰী লাট গাঁওবুঢ়াক অসম চৰকাৰৰ ৰাজহ বিভাগৰ তৰফৰ পৰা আগবঢ়োৱা স্মাৰ্ট ফোন আনুষ্ঠানিকভাৱে প্ৰদান কৰা হয়। চৰকাৰী গাঁওবুঢ়া সকলৰ কাৰ্য পৰিচালনাত যথেষ্ট সহায়ক হোৱাকৈ প্ৰদান কৰা এই স্মাৰ্ট ফোন বিতৰণৰ শুভাৰম্ভ কৰে-ঢকুৱাখনাৰ বিধায়ক তথা ৰাজ্য চৰকাৰৰ মন্ত্ৰী নৱ কুমাৰ দলেয়ে।আজিৰ এই স্মাৰ্ট ফোন বিতৰণৰ অনুষ্ঠানত উপস্থিত থাকে লখিমপুৰ জিলা পৰিষদৰ সভানেত্ৰী-মঞ্জু বৰগোঁহাই, ঢকুৱাখনাৰ মহকুমাধিপতি অৰিন্দম বৰুৱা, ঢকুৱাখনাৰ চক্ৰ বিষয়া অপূৰ্ব নাথ, সোৱণশিৰীৰ চক্ৰ বিষয়া কৃষ্ণ অৰ্জুন বৰ্মনৰ লগতে কেইবাগৰাকীও বিশিষ্ট ব্যক্তি। অন্যহাতে এই অনুষ্ঠানতে সাম্প্ৰতিক ‘কভিড-১৯’ৰ জটিল পৰিস্থিতিত মাস্ক প্ৰস্তুত কৰি ৰাইজলৈ সহায় আগবঢ়োৱা ঢকুৱাখনাৰ পাঁচটাকৈ মহিলা আত্মসহায়ক গোটলৈ মাননি আগবঢ়োৱা হয়। লগতে ক’ভিড-১৯ সৃষ্ট সাম্প্ৰতিক পৰিস্থিতিত আৰ্থিকভাৱে অসুবিধাৰ সন্মুখীন হোৱা ঢকুৱাখনাৰ বিধান সভা সমষ্টিৰ অন্তৰ্গত ৰূপ চৰ্চা কৰ্মী আৰু ক্ষৌৰ কৰ্মী সকলক আৰ্থিক সাহায্য প্ৰদান কাৰ্যসূচীৰ প্ৰথম পৰ্যায়ত উপস্থিত থাকিব নোৱাৰা সকলকো আজি নিজাকৈ আৰ্থিক সাহায্য আগবঢ়াই বিধায়ক নৱ কুমাৰ দলেয়ে।
