যদি আপুনি ব্যায়াম নকৰাকৈ, স্বাভাৱিক খাদ্য গ্ৰহণ নকৰাকৈ ছমাহৰ ভিতৰত ৫-৬ কিলোগ্ৰাম ওজন কমি যায়, তেন্তে আপুনি বুজিব যে শৰীৰত কিবা আভ্যন্তৰীণ সমস্যা আছে। সুস্থ হৈ থাকিবলৈ ওজন নিয়ন্ত্ৰণত ৰাখিব লাগিব। অতিৰিক্ত ওজন বা মেদবহুল হ’লে আন ৰোগ হোৱাৰ সম্ভাৱনা বৃদ্ধি পায়। গতিকে বহুতো স্বাস্থ্য সচেতন লোকে জিমলৈ গৈ ব্যায়াম কৰে। আকৌ বহুতৰে অস্বাভাৱিকভাৱে দ্ৰুত হাৰত ওজন কমে, আনকি বেছি শাৰীৰিক কাৰ্য্যকলাপ নকৰাকৈও। অনিচ্ছাকৃতভাৱে এই ওজন কমি যোৱাটো শৰীৰৰ বাবে ভাল নহ’বও পাৰে। চিকিৎসকৰ মতে, যদি আপুনি ব্যায়াম নকৰাকৈ, স্বাভাৱিক খাদ্য গ্ৰহণ নকৰাকৈ ছমাহৰ ভিতৰত ৫-৬ কেজি ওজন কমি গৈছে, তেন্তে আপুনি বুজিব লাগে যে শৰীৰত আভ্যন্তৰীণ সমস্যা আছে।
এইদৰে ওজন কমাব পৰা কাৰণবোৰ হৈছে-
১) ডায়েবেটিছঃ
তেজৰ চেনিৰ পৰিমাণ বেছি হোৱাৰ ফলত ওজন কমি যাব পাৰে। ইয়াৰ বাবে ডায়েবেটিছ ৰোগীৰ ওজন কমি যোৱাৰ প্ৰৱণতা থাকে। ডায়েবেটিছ মানে তেজত ইনচুলিনৰ পৰিমাণ কমি যোৱা। ইনচুলিনৰ অনুপস্থিতিত শৰীৰৰ কোষবোৰে নিজকে গতিশীল আৰু শক্তিশালী কৰি ৰাখিবলৈ পেশী আৰু চৰ্বিৰ ওপৰত নিৰ্ভৰ কৰে। ফলত সামগ্ৰিকভাৱে শৰীৰৰ ওজন ক্ৰমান্বয়ে হ্ৰাস পায়।
২) হাইপাৰথাইৰয়ডিজমঃ
থাইৰয়ড হৰম’ন পৰ্যাপ্ত নহ’লে যেনেকৈ সমস্যা হ’ব পাৰে, অতি সক্ৰিয় থাইৰয়ড গ্ৰন্থিও সমস্যাজনক হ’ব পাৰে। যদি এনেকুৱা হয় তেন্তে শাৰীৰিক ব্যায়ামৰ অবিহনেও ওজন দ্ৰুতগতিত কমিবলৈ আৰম্ভ কৰে। চিকিৎসাৰ ক্ষেত্ৰত এই সমস্যাক হাইপাৰথাইৰয়ডিজম বুলি কোৱা হয়।
৩) মানসিক চাপঃ
ব্যক্তিগত জীৱন বা গধুৰ কৰ্ম চাপৰ বাবে উদ্বেগ আৰু মানসিক সমস্যা বাঢ়িছে। মানসিক চাপৰ হৰম’নে বিপাকীয় ক্ৰিয়াত প্ৰভাৱ পেলায়। বিপাকীয় ক্ৰিয়াই শৰীৰৰ ওজনো নিয়ন্ত্ৰণ কৰে। ফলত অস্বাভাৱিক বিপাকীয় ক্ৰিয়াৰ ফলত ওজন বৃদ্ধি হ’ব পাৰে।
৪) ডিমেনচিয়াঃ
ডিমেনচিয়াৰ লগত ওজন কমি যোৱাৰ সম্পৰ্ক আছে। ডিমেনচিয়াত আক্ৰান্ত হোৱাৰ অৰ্থ হ’ল স্মৃতিশক্তি ক্ৰমান্বয়ে দুৰ্বল হৈ পৰে। স্মৃতিশক্তি বেয়া হোৱাটোৱে দৈনন্দিন খাদ্যাভ্যাসতো প্ৰভাৱ পেলায়। সঠিক সময়ত আৰু পৰ্যাপ্ত পৰিমাণে খোৱাটো সদায় মনত ৰখা নহয়। এনে অনিয়ম দীৰ্ঘদিন ধৰি চলি থাকিলে স্বাভাৱিকভাৱে ওজন কমিবলৈ আৰম্ভ কৰিব। ইয়াৰ উপৰিও ডিমেনচিয়া ঔষধৰ কিছু পাৰ্শ্বক্ৰিয়াও থাকে। সেই ঔষধৰ প্ৰভাৱৰ বাবে শৰীৰৰ ওজন ক্ৰমান্বয়ে কমি যায়।
৫) কৰ্কট ৰোগঃ
অস্বাভাৱিক হাৰত ওজন কমি যোৱাটো কেন্সাৰৰ প্ৰাৰম্ভিক লক্ষণ হ’ব পাৰে। বিশেষকৈ পেনক্ৰিয়াচ, হাওঁফাওঁ আৰু পেটৰ কৰ্কট ৰোগত ওজনৰ পৰিৱৰ্তন লক্ষ্যণীয়। মাৰাত্মক বা ক্ষতিকাৰক টিউমাৰেও শৰীৰৰ বিপাকীয় ক্ৰিয়াত ব্যাঘাত জন্মায়। লগতে হৰম’নৰ উৎপাদন আৰু নিঃসৰণৰ পৰিৱৰ্তন ঘটে। গতিকে কেন্সাৰ হ’লে ওজন কমি যায়।