ভেৰগাঁৱ সমষ্টিত বিপিএফৰ নিৰ্বাচনী প্ৰচাৰ । মিছাৰ আশ্ৰয় নোলোৱা দল হৈছে বিপিএফ : কমলী বসুমতাৰী

টংলা :  ওদালগুৰি জিলাৰ ভেৰগাঁৱ সমষ্টিত এতিয়া বিপিএফৰ নিৰ্বাচনী প্ৰচাৰ তুঙ্গত। মিছাৰ আশ্ৰয় নোলোৱা দল হৈছে বিপিএফ, দলে পূৰ্বেও নিৰ্বাচন খেলি জয়ী হৈছে এইবাৰো হ’ব আৰু ভবিষ্যতেও জয়ী হৈ থাকিব। বিটিচিত বিপিএফৰ বিকল্প নাই। ১৭ বছৰত বিপিএফে অঞ্চলটোত সৰ্বতো প্ৰকাৰে উন্নয়নৰ কাৰনে ৰাজনৈতিক সংগ্রাম কৰিছে। এই মন্তব্য পানেৰীৰ বিধায়িকা কমলী  বসুমতাৰীৰ। শুকুৰবাৰে ওদালগুৰি জিলাৰ ভেৰগাঁৱ সমষ্টিৰ ডিমাকুচিত মহিলা বিপিএফৰ সাংগঠনিক আৰু সজাগতা সভাত অতিথি হিচাপে উপস্থিত থাকি ভাষণত এই মন্তব্য কৰে। লগতে বিধায়িকা কমলী বসুমতাৰীয়ে কয় যে, বিটিচিত মহিলাসকল বিশেষভাৱে পিছ পৰি থকা নাই,  মহিলাসকলৰ নেতৃত্ব আৰু স্থিতিৰ বাবেই বিগত নিৰ্বাচনত বিপিএফ জয়ী হৈ আহিছে। তেওঁ কয় যে বিটিচিত একাংশ ৰাজনৈতিক দলে মিছাৰ কথাৰ প্ৰলোভন দি ভোট কিনিব নোৱাৰে। ৰাইজে বুজি পাইছে যে বিপিএফ উন্নয়ন, প্ৰগতি আৰু শান্তিৰ দল বুলি। বিপিএফ দলে নীতি আদৰ্শৰে নিৰ্বাচনত জয়ী হৈ আহিছে। ইউপিপিএলক কঠোৰ ভাষাৰে সমালোচনা কৰি বসুমতাৰীয়ে কয় যে আত্মসম্মান ডাঙৰ কথা কিন্তু ইউপিপিএলৰ আত্মসম্মান নাই। সাধাৰণ জনতাক মিছাৰ কথাৰ প্ৰলোভন দি বিভ্রান্ত কৰিব বিচাৰিছে ইউপিপিএল দলে। সমাগত নিৰ্বাচনত ভোটাৰ ৰাইজে বিপিএফক বিপুল সংখ্যক ভোট দি চতুৰ্থবাৰৰ বাবে বিটিচিত বহুৱাব। সভাত ভেৰগাঁৱ সমষ্টিৰ ১৪ টা ভিচিডিচিৰ প্ৰায় পাঁচ শতাধিক মহিলাই অংশগ্রহণ কৰে।