টপাৰপথাৰৰ উদীয়মান যুৱকে নিৰ্মাণ কৰিলে সুদীৰ্ঘ বাঁহৰ দলং ।
দৈনন্দিন বাৰ্তাৰ সেৱা, সোণতলী
ছয়গাঁও বিধানসভা সমষ্টিৰ এলেকাধিন টপাৰপথাৰত নিৰ্মাণ কৰা বাঁহৰ দলংখন কালি আনুষ্ঠানিকভাৱে মুকলি কৰা হয়৷৷ উল্লেখ্য যে দক্ষিণ কামৰূপ জিলাৰ ছয়গাঁও বিধানসভা সমষ্টিৰ জোৰশিমুলী আৰক্ষী চকীৰ গাতে লাগি থকা টপাৰপথাৰ ই এণ্ড ডি মথাউৰি সংযোগী উত্তৰ অংশৰ পথছোৱাত স্থায়ী দলং এখনৰ প্ৰয়োজন জনসাধাৰণে বহুদিনৰে পৰা বাৰুকৈ উপলব্ধি কৰিছিল৷ জানিব পৰামতে, টপাৰপথাৰৰ উদীয়মান যুৱকদ্বয় যথাক্ৰমে ছাহজাহান আলী, ছিৰাজুল হক, জামাল উদ্দিন, ৰবিউল হুছেইনৰ নেতৃত্বত পথছোৱাত সুদীৰ্ঘ এখন বাঁহৰ দলং নিৰ্মাণ কৰে৷ উল্লেখ্য যে নিজৰ গাঁঠিৰ ধন খৰচ কৰি তথা ৰাইজৰ যাতায়াতৰ সুবিধাৰ্থে নিৰ্মাণ কৰি উলিওৱা দলংখন পাৰাপাৰৰ বাবদ কিছু ধন সংগ্ৰহ কৰা হ’ব৷ প্ৰণিধানযোগ্য যে ২৬০ ফুট দৈৰ্ঘ্যৰ বাঁহৰ সাঁকোখন নিৰ্মাণৰ ক্ষেত্ৰত দৈনিক ২৫ জন শ্ৰমিকে কাম কৰি ৮ দিনে নিৰ্মাণ কৰি উলিয়ালে দলংখন৷ টপাৰপথাৰৰ সুদীৰ্ঘ বাঁহৰ সাঁকোখন কালি ৰাইজৰ বাবে আনুষ্ঠানিকভাৱে মুকলি কৰে ইছমাইল আলীয়ে৷ উদ্বোধনী অনুষ্ঠানত অঞ্চলটোৰ আব্দুল হাই আনছাৰী, লোকমান হেকিম, আবুল হুছেইন, দৌলত খান, মিৰাজুল ইছলাম, বিল্লাল হুছেইন প্ৰমূখ্যে বিশিষ্ট ব্যক্তিসকল অংশগ্ৰহণ কৰে৷
প্ৰেৰকঃ ৰেজাউল কবিৰ, সোণতলী