গ্ৰাম্য অৰ্থনীতিৰ ধবজাবাহক কন্যকাৰ আদৰ্শ প্ৰতিজন বিধায়কে লোৱা উচিত ৷ কন্যকাৰ আদৰ্শ ৰাজ্যজুৰি বিয়পোৱাৰ দিশত বিধায়ক পদ্ম হাজৰিকাই নেতৃত্ব লঁওক – ৰূপক শৰ্মা ৷

জামুগুৰিহাটঃ

গ্ৰাম্য অৰ্থনীতিৰ ধবজাবাহকস্বৰূপ জামুগুৰিহাটৰ কন্যকা বহুমুখী কৃষি পামৰ গুৰিধৰোতা বিধায়ক পদ্ম হাজৰিকাই কন্যকাৰ আদৰ্শ ৰাজ্যজুৰি বিয়পোৱাৰ ক্ষেত্ৰত নেতৃত্ব লঁওক৷যাৰ জৰিয়তে ৰাজ্যৰ প্ৰতিটো সমষ্টিৰ নিবনুৱা যুৱক যুৱতীসকলে স্বাৱলম্বীতাৰ পথ বিচাৰি পোৱাত যথেষ্ট সুবিধা হ’ব৷কন্যকাৰ পৰিৱেশে মোক যথেষ্ট আপ্লুত কৰিলে৷সু-সংগঠিত ৰূপত যুৱক যুৱতীসকলক একত্ৰিত কৰি আত্মনিৰ্ভৰশীল হ’বৰ বাবে বিধায়ক পদ্ম হাজৰিকাই যি এক বিপ্লৱৰ সুচনা কৰিছে এয়া ৰাজ্যখনৰ প্ৰতিজন বিধায়কৰ বাবেই আদৰ্শস্বৰূপ হঁওক৷এই মন্তব্য নগাঁও সমষ্টিৰ বিধায়ক ৰূপক শৰ্মাৰ৷আজি চতিয়া সমষ্টিৰ বিধায়ক পদ্ম হাজৰিকাৰ একক প্ৰচেষ্টাত গঢ় লৈ উঠা জামুগুৰিহাটৰ জীয়াভৰলী কন্যকা কৃষি পাম পৰিদৰ্শন কৰি এইদৰে সাংবাদিকৰ আগত কয় বিধায়কগৰাকীয়ে৷পুৱা ৯ বজাতেই আহি সমষ্টিৰ অন্তৰ্গত চাৰিদুৱাৰত বিধায়ক পদ্ম হাজৰিকাই সু-সংগঠিত ৰূপত গঠণ কৰি দিয়া গোটসমুহৰ দ্বাৰা গো-পালন,মৎস্য পালনৰ পদ্ধতি পৰিদৰ্শণ কৰাৰ পাছতেই প্ৰতিটো পঞ্চায়ততে গোটসমুহে লোৱা দীৰ্ঘম্যাদি কৰ্মসুচী প্ৰত্যক্ষ কৰে৷প্ৰায় ২০ জনীয়া এটি দল লৈ অহা বিধায়কগৰাকীয়ে পৰৱৰ্তী সময়ত জামুগুৰিহাটৰ কন্যকাৰ গামোচা উদ্যোগ,খাটি সৰিয়হৰ মিঠাতেলৰ উদ্যোগ,পশুৰ খাদ্য প্ৰস্তুতকৰণৰ উদ্যোগ আৰু জামুগুৰিহাটৰ জীয়াভৰলী নদীৰ দাঁতিচৰত চতিয়াৰ বিধায়ক পদ্ম হাজৰিকাৰ একক প্ৰচেষ্টাত গঢ় লৈ উঠা কন্যকা বহুমুখী কৃষি পাম পৰিদৰ্শন কৰি আপ্লুত হৈ পৰে৷জীয়াভৰলীৰ দাঁতিচৰত প্ৰায় দুই হাজাৰ বিঘা মাটিৰে আগুৰা কন্যকাৰ বুকুত ষ্ট্ৰবেৰীৰ খেতি,কলৰ বাগান,নাৰিকল,তামোলৰ বাগান,জিকা,বদিমাহ,ৰঙালাও,নহৰু,পিয়াজ,বিহ জলকীয়া,গোমধান,মাকৈ আদি উৎপাদিত ফচল স্বচক্ষে দেখি উৎফুল্লিত হৈ পৰাৰ লগতে কন্যকাৰ গো-পালন,মহ পালন,মৎস্য পালন,মাছৰ পোনা উৎপাদন আদিবোৰো পৰিদৰ্শন কৰে৷পৰৱৰ্তী সময়ত জামুগুৰিহাটৰ পৰিদৰ্শন বঙলাত  সম্বোধন কৰা এক সাংবাদিক মেলত বিধায়ক ৰূপক শৰ্মাই কয় বহুদিনৰপৰাই কন্যকাৰ কথা শুনি আহিছিলো আৰু আজি সেই আশা আজি পূৰণ হ’ল বুলিও উল্লেখ কৰে৷কন্যকাৰ এই কৃষি বিপ্লৱ আৰু অৰ্থনৈতিক বিপ্লৱ ৰাজ্যজুৰি বিয়পি পৰিলে চতিয়া সমষ্টিৰ চাৰিহাজাৰ নিবনুৱা যুৱতী আত্মনিৰ্ভৰশীল হৈ উঠাৰ দৰেই আন সমষ্টিসমুহতো নিবনুৱাসকল স্বাৱলম্বী হোৱাৰ দিশত উপকৃত হ’ব বুলি দৃঢ়তাৰে কৈ চতিয়া সমষ্টিৰ কন্যকাৰ এই আদৰ্শ নগাঁও সমষ্টিতো গঢ় দিয়াৰ দিশত বিধায়ক পদ্ম হাজৰিকাৰ সহায় সহযোগীতা বিচাৰে বিধায়ক শৰ্মাই৷কন্যকা পৰিদৰ্শন কৰি বিধায়ক ৰূপক শৰ্মাৰ এনে উৎসাহজনক মন্তব্য আৰু কন্যকাৰ দৰেই নগাঁও সমষ্টিত কৃষিৰ জৰিয়তে অৰ্থনৈতিক বিপ্লৱ আৰম্ভ কৰিবৰ বাবে বিচৰা সহায় নিতান্তই থাকিব বুলিও উল্লেখ কৰে বিধায়ক পদ্ম হাজৰিকাই৷উল্লেখ্য যে কন্যকা কৃষি পামৰ জৰিয়তেই বহু নিবনুৱাই কৰ্মসংস্থাপনৰ পথ লাভ কৰাৰ উপৰিও পামখনত উৎপাদিত কৃষিজাত সামগ্ৰীয়েও ইতিমধ্যে বজাৰ দখল কৰিবলৈ সক্ষম হৈছে৷ইয়াৰোপৰি কন্যকা বহুমুখী পামতেই গো-পালন,গাহৰী পালন,মৎস্য পালনৰ জৰিয়তে বহু নিবনুৱা কৰ্মমুখী হোৱাৰ উপৰিও গাখীৰ,মাছ,মাংস বিক্ৰী কৰিও স্বাৱলম্বিতাৰ পথ বিচাৰি পাইছে৷তাৰোপৰি ১০ জনীয়াকৈ পৃথকে পৃথকে মুঠ চাৰিশ গোট গঠণৰ পিছত ৪ হাজাৰ যুৱকেও কন্যকাৰ জৰিয়তেই স্বাৱলম্বিতাৰ পথ বিচাৰি পাইছে ৷