Breaking

জাপানৰ ৰাষ্ট্ৰদূতৰ সৈতে অসমত কেন্দ্ৰীয় বৈদেশিক পৰিক্ৰমা মন্ত্ৰী

0 2,009

বিধানসভা নিৰ্বাচনৰ পূৰ্বে অসমলৈ কেন্দ্ৰীয় মন্ত্ৰীসকলৰ সঘনাই সোঁত ব’বলৈ আৰম্ভ কৰিছে । এইবাৰ কেন্দ্ৰীয় বৈদেশিক পৰিক্ৰমা বিভাগৰ মন্ত্ৰী এছ জয়শংকৰ অসমত উপস্থিত হৈছেহি।

কালি নিশাৰ ভাগত জাপানৰ ৰাষ্ট্ৰদূত চাতোশ্বি চুজুকিৰ সৈতে গুৱাহাটীত উপস্থিত হয়হি জয়শংকৰ। নিশাৰ ভাগত গোপীনাথ বৰদলৈ আন্তৰ্জাতিক বিমানবন্দৰত দুয়োকে আদৰণি জনায় মন্ত্ৰী চন্দ্ৰমোহন পাটোৱাৰীয়ে।

আজি পুৱাৰ ভাগত তেওঁলোক দুয়োৱে মা-কামাখ্যা দৰ্শন কৰি আশিস লয়। তেওঁলোক দুয়োগৰাকীক সংগ দিয়ে মন্ত্ৰী হিমন্ত বিশ্ব শৰ্মাই।

ইপিনে, মা কামাখ্যা দৰ্শন কৰি উঠি পোনে পোনে দুয়োগৰাকী উপস্থিত হয়গৈ খাৰঘুলিস্থিত জাইকা পানীযোগান প্ৰকল্পত। তিনিবছৰ ধৰি নিৰ্মাণৰ কাম সম্পূৰ্ণ নোহোৱা এই প্ৰকল্পৰ কাম-কাজ কিমান দূৰ আগবাঢ়িছে সেয়া পৰিদৰ্শন কৰে কেন্দ্ৰীয় বৈদেশিক পৰিক্ৰমা মন্ত্ৰীগৰাকীয়ে।

মন্ত্ৰী হিমন্ত বিশ্ব শৰ্মাৰ উপৰিও গুৱাহাটী উন্নয়ন দপ্তৰৰ দায়িত্বত থকা মন্ত্ৰী সিদ্ধাৰ্থ ভট্টাচাৰ্য্যইয়ো তেওঁলোক দুয়োকে সংগ দিয়ে।

ইয়াৰ পাছতে তেওঁলোক দুয়ো ৰাওনা হয় শ্ৰীমন্ত শংকৰদেৱ কলাক্ষেত্ৰ অভিমুখে। উদ্যোগ, বাণিজ্য বিভাগৰ মন্ত্ৰী চন্দ্ৰমোহন পাটোৱাৰী, মুখ্যমন্ত্ৰী সৰ্বানন্দ সোণোৱালৰ উপস্থিতিত ঔদ্যোগিক খণ্ডৰ বিকাশ সন্দৰ্ভত কেইবালানি আলোচনাত মিলিত হ’ব।

তাৰ পাছতে জাপানৰ সৈতে কেনেধৰণৰ ঔদ্যোগিক চুক্তি স্বাক্ষৰিত হ’ব সেয়া নিশ্চয়কৈ গম পোৱা যাব। জানিব পৰা মতে, জাপানৰ ৰাষ্ট্ৰদূতগৰাকীয়ে অসমত জাপানে বিনিয়োগৰ বাবে আগ্ৰহী বুলি সদৰী কৰে।