ধেমাজি জিলাৰ “সাহিত্য সভা ভৱনত” পুৱা দহ বজাৰ পৰা , “আঘোণৰ দুপৰীয়াত কবিৰ আড্ডা” শীৰ্ষক অনুষ্ঠানটি অনুষ্ঠিত হয় । “আঘোণৰ দুপৰীয়াত কবিৰ আড্ডা” অনুষ্ঠানটি উদ্বোধন কৰে “আইদেউ সন্দিকৈ” বঁটাপ্ৰাপ্ত বিষয়া বিমলা গগৈয়ে আৰু সভাখন সঞ্চালনা কৰে মৰিঢল মহাবিদ্যালয়ৰ প্ৰবক্তা ড০ পুৰৱী দুৱৰায়ে । অনুষ্ঠানটি আৰম্ভণিৰে পৰা শেষলৈকে আঁত ধৰে বিপুল শৰ্মাই ।
উক্ত অনুষ্ঠানটিত বিশ্বনাথ জিলা কবি চক্ৰৰ মুখ্য সম্পাদিকা সদৌ অসম কবি চক্ৰৰ যুটীয়া সম্পাদিকা ৰুবীশইকীয়া দাসে , বিশ্বনাথ জিলা কবি চক্ৰৰ কাৰ্যকৰী সভাপতি টেজেন হাজৰিকা আৰু যুটীয়া সম্পাদক প্ৰেম বৈষ্ণৱ আৰু পূৰ্বালী শইকীয়াক উদ্যোক্তা সকলৰ তৰফৰপৰা ফুলাম গামোছাৰে আদৰণি জনোৱা হয় । এই অনুষ্ঠানত প্ৰত্যেকেই একো একোটাকৈ স্বৰচিত কবিতা পাঠ কৰে ।
যোৱা ১৫ নৱেম্বৰ তাৰিখে, কৰ্কট ৰোগী সকলৰ বাবে, নিজৰ মৰমৰ চুলি সমূহ স্বেচ্ছাই দান দিয়া, প্ৰিয়ংকা দেৱী হাজৰিকাক আনুষ্ঠানিক ভাৱে, ফুলাম গামোছাৰে আদৰণি জনোৱা হয় । “আঘোণৰ দুপৰীয়াত কবিৰ আড্ডাত” ধেমাজি জিলাৰ কাষৰীয়া জিলা লক্ষীমপুৰ জিলাৰ বিশিষ্ট কবি প্ৰতিমা বুঢ়াগোহাঁই , ৰঞ্জিতা চেতিয়া , অমৰজ্যোতি ঘোষ , মুকুল ৰঞ্জন কোচ, মিলন দত্ত মাধুৰ্য গগৈকে আদি কৰি বহু নবীন-প্ৰবীণ কবিৰ উপস্থিতিত অনুষ্ঠানভাগ সফলতাৰে সম্পন্ন হয় । কবিতা পাঠৰ এই বিশেষ অনুষ্ঠানটিতে নবীন বুঢ়াগোহাঁইক সভাপতি হিচাপে নিৰ্বাচিত কৰি সৰ্বসন্মতি ক্ৰমে এটি বলিষ্ঠ “ধেমাজি জিলা কবি চক্ৰ ” গঠন কৰা হয় । এই অনুষ্ঠানটিত যিসকল কবিয়ে স্বৰচিত কবিতা পাঠ কৰি অনুষ্ঠানটি সাফল্যমণ্ডিত কৰিছে তেখেত সকলক উদ্যোগক্তা সকলে কৃতজ্ঞতা জ্ঞাপন কৰে ।