আৰক্ষীলৈ গামোচা গড়গাঁও সৰ্বোদয় সমাজৰঃ কভিড যোদ্ধালৈ প্ৰেৰণা ।
নাজিৰাঃ
ঐতিহাসিক গড়গাঁও ৰাজকাৰেঙৰ কাষত প্ৰতিষ্ঠিত মূক্তি-যোদ্ধাসকলৰ স্বতন্ত্ৰ গ্ৰামসভাৰ পৰিয়ালবৰ্গৰ হৈ ৩১ মে’ৰ দুপৰীয়া নাজিৰা আৰক্ষী থানাৰ আৰক্ষীৰ লোকসকলক এখনি প্ৰশংসা পত্ৰ সহ একোখনিকৈ জাতীয় জীৱনৰ চানেকি স্বৰূপ ফুলাম গামোচাৰে অভিনন্দন যচা হয়. । এই উপলক্ষে নাজিৰা আদৰ্শ আৰক্ষী থানাৰ দুৱাৰ মুখত চক্ৰ আৰক্ষী বিষয়া দীপক সূত্ৰধৰ, ভাৰপ্ৰাপ্ত আৰক্ষী বিষয়া সুশীল কুমাৰ দত্তসহ আৰক্ষী বিষয়া আৰু জোৱান সকলে এই অভিবাদন গ্ৰহণ কৰে । ভাৰপ্ৰাপ্ত আৰক্ষী বিষয়াই আচাৰ্য্য বিনোৱা ভাৱেৰ আদৰ্শেৰে অগ্ৰসৰ হোৱা ভূমি দান আৰু মহামানৱ মহাত্মা গান্ধীৰ সৰ্বোদয় আন্দোলনৰ দৰ্শন আৰু স্মৃতি বিজড়িত গড়গাঁও সৰ্বোদয় সমাজ গ্ৰামদান গ্ৰামসভাৰ প্ৰচেষ্টাক প্ৰেৰণা বুলি গ্ৰহণ কৰি কৃতজ্ঞতা প্ৰকাশ কৰে । সভাপতি ক্ষীৰোদ কুমাৰ বৰদলৈ, সম্পাদক প্ৰণৱ খাটনীয়াৰে পৰিচালনা কৰা অনুষ্ঠানত সংবাদ-কৰ্মী ধ্ৰুৱজ্যোতি সন্দিকৈ, ভাস্কৰজ্যোতি বৰগোহাঁই উপস্থিত থাকে ।ইয়াৰ পূৰ্বে মহকুমা আৰক্ষী বিষয়া দ্বীপজ্যোতি তালুকদাৰক তেওঁৰ কাৰ্য্যলয়ত আৰু ভাৰপ্ৰাপ্ত আৰক্ষী বিষয়া বিজয় দুৱৰা সহ আৰক্ষী সকলক শিমলুগুৰি থানা চৌহদত গামোচা পৰিধান কৰোৱা হয় । সৰ্বোদয় সমাজে আৰক্ষীৰ দক্ষতা আৰু সততাৰে কভিদ যুদ্ধত জয় লাভ কৰি জনতাক সুৰক্ষিত কৰি যাব বুলি আশা ব্যক্ত কৰে ।