ৰাষ্ট্ৰীয় স্বাস্থ্য অভিযান ওদালগুৰি জিলা স্বাস্থ্য বিভাগৰ বিশেষ আয়োজনত জিলাখনৰ শিক্ষানুষ্ঠান সমূহত চলি আহিছে ফ্ল’ৰ’ছিছ ৰোগৰ প্ৰতিৰোধ আৰু নিয়ন্ত্ৰণ সন্দৰ্ভত বিশেষ সজাগতা সভা । এই অভিযানৰ সফল অংশ ৰূপে আজি (২ফেব্ৰুৱাৰী) ওৰাং খণ্ড প্ৰাথমিক স্বাস্থ্য কেন্দ্ৰৰ অন্তৰ্গত গেলাবিল উচ্চ মাধ্যমিক বিদ্যালয়ত অনুৰূপ সজাগতা সভা অনুষ্ঠিত হয় । বিদ্যালয়খনৰ শিক্ষক-শিক্ষয়িত্ৰী , ছাত্ৰ-ছাত্ৰীৰ উৎসাহজনক উপস্থিতিত অনুষ্ঠিত সভাত জিলা স্বাস্থ্য বিভাগৰ স্বাস্থ্য বিষয়া ডাঃ মৃদুল চৰেণ ,কাণ-নাক-ডিঙিৰ বিশেষজ্ঞ ডাঃ হিৰণ্য কুমাৰ গয়াৰী,ওৰাং ব্ল’ক পিএইচিৰ সহকাৰী আচনি প্ৰৱন্ধক জুমিশ্ৰী শৰ্মা সমন্বিতে কেইবাগৰাকী স্বাস্থ্য কৰ্মী উপস্থিত থাকে । স্বাস্থ্য বিষয়াদ্বয়ে পৃথিৱীৰ ভূ-গৰ্ভত থকা ফ্ল’ৰাইড নামৰ এবিধ ৰাসায়নিক পদাৰ্থ অত্যধিক মাত্ৰাত পানী বা খাদ্যৰ মাধ্যমেৰে মানুহৰ শৰীৰত প্ৰৱেশ কৰিলে ফ্ল’ৰ’ছিছ ৰোগে দেখা দিয়ে বুলি উল্লেখ কৰে ।
দাত হালধীয়া পৰা ,হাত বা ভৰি বেকা হোৱা, ভৰি ভিতৰ -বাহিৰ বা সন্মুখৰ ফালে হালি পৰা , আঠুৰ ওপৰত ফুলি উঠা ,কম বয়সতে বৃদ্ধাৱস্থাৰ লক্ষণ দেখা দিয়া , পেট গধুৰ লাগি থকা ইত্যাদি ফ্ল’ৰ’ছিছৰ লক্ষণ বুলি সকলোকে অৱগত কৰে ।ফ্ল’ৰ’ছিছৰ উপস্থিতি পানীৰ পৰীক্ষা ,তেজ আৰু প্ৰস্ৰাৱ পৰীক্ষা ,হাড়ৰ এক্সৰেৰ দ্বাৰা কৰিব পৰা সন্দৰ্ভতো সাৱলীল ব্যাখ্যা কৰে তেওঁলোকে ।বিশেষ ফিল্টাৰৰ ব্যৱহাৰ ,বৰষুণৰ পানী সংগ্ৰহ, অন্যান্য ফ্ল’ৰাইডমুক্ত পানীৰ ব্যৱহাৰৰ দ্বাৰা ফ্ল’ৰাইডবিহীন পানী কেনেকৈ পাব পাৰি তাৰো মনোজ্ঞ বিশ্লেষণ আগবঢ়ায় স্বাস্থ্য বিষয়াদ্বয়ে ।ফ্ল’ৰ’ছিছৰ পৰা পৰত্ৰাণ পাবলৈ কেলছিয়াম ,মেগ্নেছিয়াম ,ভিটামিন-চি, প্ৰটিন যুক্ত আহাৰ যেনে গাখীৰ ,আমলখি ,নেমু ,ভেণ্ডি ,সেউজীয়া শাক-পাচলি ,তিলৰ লাড়ু বা পিঠা ,কণী ছয়াবিন আদি খাবলৈ ছাত্ৰ-ছাত্ৰীসকলৈ পৰামৰ্শ আগবঢ়ায় ।
এই মনোজ্ঞ সজাগতা সভাৰ প্ৰাৰম্ভতে বিদ্যালয়ৰ প্ৰধান শিক্ষক প্ৰদীপ কুমাৰ দেই চমু আদৰণি ভাষণ আগবঢ়ায় ।বিদ্যালয় পৰিয়ালৰ তৰফৰ পৰা দুই গৰাকী স্বাস্থ্য বিষয়াক ফুলাম গামোচাৰে সন্মান যছা হয় ।ইয়াৰ মাজতে শিক্ষাৰ্থী জুমনজ্যোতি হাজৰিকা , কুহি বৰা ,ভাগ্যশ্ৰী মাহাতোৱে সভাত বোধগম্য হোৱা বিষয়বস্তুৰ ওপৰত সুন্দৰ ব্যাখ্যা আগবঢ়ায় ।