নাজিৰাত কোৱাৰেণ্টাইন চেণ্টাৰৰ চাফাই কৰ্মীক মহকুমা প্ৰশাসনৰ সম্ভাষণ

নাজিৰা

মহকুমা প্ৰশাসনৰ দ্বাৰা স্থাপন কৰা গড়গাঁও কোৱাৰেণ্টাইন কেন্দ্ৰত নিয়োজিত চাফাই কৰ্মচাৰী আৰু বীজানুনাশক কৰ্মচাৰীসকলক উৎসাহিত কৰাৰ উদ্দেশ্য আজি নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামীয়ে তেওঁলোকক একোখনকৈ ফুলাম গামোচাৰে সম্ভাষণ জনায়। মহকুমাধিপতিৰ সৈতে ভাঃ প্ৰাঃ নাজিৰা ৰাজহ চক্ৰ বিষয়া কবিতা কাকতি কোঁৱৰ আৰু সহকাৰী আয়ুক্ত ৰাজীৱ সোণোৱালেও সহযোগ কৰে। লগতে তেল আৰু প্ৰাকৃতিক গেছ নিগম, অসম সম্পদৰ অধীনত বহিঃৰাজ্য পৰা আহিব লগা তথা ইতিমধ্যে আহি নাজিৰাত উপস্থিত হোৱা কৰ্মচাৰীসকলৰো স্বাস্থ্য পৰীক্ষাৰ লগতে তেওঁলোকক পদ্ধতিগতভাৱে  কোৱাৰেণ্টাইন ব্যৱস্থা কৰাৰ সমূহ দিশ তেওঁ তদাৰক কৰে। নাজিৰালৈ আহিব লগা বিষয়াসকলৰ ভিতৰত মুঠ ১১৮ জন কৰ্মচাৰীৰ ভিতৰত ২৩ মে’ত  উপস্থিত হোৱা ৪০ জন কৰ্মচাৰীৰ স্বাব চিকিৎসা বিভাগৰ তৰফৰ পৰা ইতিমধ্যে সংগ্ৰহ কৰা হৈছে।  তেওঁলোকৰ কোৱাৰেণ্টাইন প্ৰক্ৰিয়া সন্দৰ্ভত ৰাইজৰ মাজত কিছু সন্দেহ তথা সংশয় থকাৰ পৰিপ্ৰেক্ষিতত মহকুমাধিপতিয়ে জানিবলৈ দিয়ে যে বহিঃৰাজ্যৰ পৰা অহা সকলো লোকৰে কোৱাৰেণ্টাইন ব্যৱস্থা কৰাটো এশ শতাংশ নিশ্চিত৷ গতিকে কোনোলোককে ভয় বা শংকা মনত নাৰাখিবলৈ ৰাইজক আহ্বান জনাইছে।