ধঁপাতবিৰোধী আইনক উলংঘা কৰি নাজিৰা মহকুমাত অব্যাহত গুটখাৰ ৰমৰমীয়া ব্যৱসায় । গেলেকীত আৰক্ষীয়ে জব্দ কৰিলে গুটখাঃ উদ্ধাৰত নামিল জাতীয় সংগঠনৰ নেতা-সাংবাদিক : বিৰূপ প্ৰতিক্ৰিয়া ।

নাজিৰা  পৰা দিলীপ হাজৰিকা

 সমগ্ৰ অসমত অব্যাহত থকা ধঁপাতবিৰোধী আইনক ভৰিৰে মোহাৰি শিৱসাগৰ জিলা তথা নাজিৰা মহকুমাত একাংশ অসাধু ব্যৱসায়ীয়ে অব্যাহত ৰাখিছে যুৱ প্ৰজন্মৰ বাবে বৰবিহ স্বৰূপ গুটখাৰ ৰমৰমীয়া ব্যৱসায়।ইতিমধ্যে চাৰিটা পৰ্যায়ৰ লকডাউনৰ সময়ছোৱাত এনে একাংশ ধুৰন্ধৰ ব্যৱসায়ীয়ে চাধা,গুটখা,চিগাৰেট আদি কলা’বজাৰত অধিক দামত বিক্ৰী কৰি লাখ টকাৰ উপাৰ্জন কৰা বুলি জানিব পৰা গৈছে।কৰ’না ভাইৰাছ সংক্ৰমণ প্ৰতিৰোধৰ স্বাৰ্থত চৰকাৰে ঘোষণা কৰা লকডাউনৰ সময়ছোৱাত বিভিন্ন খাদ্য সামগ্ৰীৰ অভাৱ হোৱাৰ দৰে মাদক দ্ৰব্য চাধা,চিগাৰেট,গুটখা আদিৰ প্ৰতি আকৃষ্ট  গ্ৰাহকসকলে এই সামগ্ৰী সমূহৰ অভাৱ অনুভৱ কৰাৰ প্ৰতি লক্ষ্য ৰাখি নাজিৰা মহকুমাত এই বৰবিহ স্বৰূপ সামগ্ৰী সমূহৰ ব্যৱসায় অব্যাহত ৰখা গুটখা মাফিয়াসকলে ইয়াৰ সুযোগ গ্ৰহন কৰি কোৰোনাৰে ধন চপোৱাত ব্যস্ত হৈ পৰে।যাৰবাবে গুটখা মাফিয়াসকলে এনে সামগ্ৰী বুজন পৰিমানে ঘৰৰ উপৰি বিভিন্ন স্হানত জমা কৰি ৰাখি বজাৰত নাটনি দেখুৱাই কমিছনভোগী এজেন্টৰ যোগে নাজিৰা মহকুমাৰ বিভিন্ন স্হানত এই বৰবিহ সমূহ তিনি/চাৰিগুণ দামত বিক্ৰী কৰি লাখ লাখ টকা উপাৰ্জন কৰি আহিছে । কালি বিয়লি ভাগত নাজিৰা মহকুমাৰ সীমান্তবৰ্তী গেলেকীত আৰক্ষীয়ে ধঁপাতবিৰোধী আইনক উলংঘা কৰি গুটখা কঢ়িয়াই নিয়া দুজন যুৱকসহ কিছু পৰিমাণৰ গুটখা জব্দ কৰে।কিন্তু আৰক্ষীয়ে এই গুটখা জব্দ কৰাৰ পাছত অবৈধ গুটখা সৰবৰাহকাৰীক উদ্ধাৰৰ বাবে এটা জাতীয় সংগঠনৰ মহকুমা পৰ্যায়ৰ এজন নেতা আৰু এজন সংবাদ কৰ্মী নামি পৰাৰ অভিযোগ উঠিছে। ঘটনা সন্দৰ্ভত জানিব পৰা মতে কালি বিয়লি ভাগত লকডাউনৰ সকলো নীতি-নিয়ম উলংঘা কৰি নাজিৰাৰ কপহুৱাৰ দুজন যুৱকে বুজন পৰিমাণৰ গুটখা এখন মটৰ চাইকেলেৰে গেলেকীত বিক্ৰীৰ বাবে নিয়ে।এইখবৰ পাই গেলেকী থানাৰ দ্বিতীয় আৰক্ষী বিষয়া সুনীল দাসে অভিযান চলাই যুৱক দুজনক আটক কৰাৰ লগতে তিনিটাকৈ বেগত নিয়া বুজন পৰিমাণৰ গুটখা খিনি জব্দ কৰে।যি সময়ত লকডাউনৰ বাবে সংবাদকৰ্মীকো বাইকত দুজন উঠাৰ নিষেধাজ্ঞা আৰোপ কৰিছে,সেই সময়ত এখন বাইকত দুজনকৈ যুৱকে বুজন পৰিমাণৰ অবৈধ গুটখা সৰবৰাহ কৰাৰ সুবিধা পাইছে।ইফালে আৰক্ষীয়ে এই গুটখা জব্দ কৰাৰ খবৰ লাভ কৰাৰ পাছতে এটা শক্তিশালী জাতীয় (ছাত্ৰ) সংঠনৰ মহকুমা সমিতিৰ এজন বিষয় — ববীয়া আৰু এজন সংবাদ কৰ্মী গেলেকী আৰক্ষী থানাত উপস্হিত হৈ যুৱ প্ৰজন্মৰ বাবে বৰবিহ স্বৰূপ এই গুটখা উদ্ধাৰৰ বাবে নামি পৰে।পাছত আৰক্ষীৰ সৈতে গোপন মিতিৰালিৰে যুৱক দুজনক ব্যক্তিগত জামিনত মুকলি কৰি নিয়ে।উল্লেখ্য যে নাজিৰা মহকুমাত গুটখা মাফিয়াৰপৰা একাংশ জাতীয়-জনগোষ্ঠী য় সংগঠনৰ একাংশ নেতাৰ লগতে একাংশ তথাকথিত সংবাদকৰ্মীয়ে কমিচন আদায় কৰি অহাৰ অভিযোগ সততে উত্থাপিত হৈ আহিছে। এনে কাৰ্যত সচেতন মহলৰ মাজত বিৰূপ প্ৰতিক্ৰিয়া সৃষ্টি হৈছে ।