✍ ৰাজীৱ কমল শইকীয়া
কৰ’না আৰু মানুহৰ সাম্প্ৰতিক যুঁজখনত, আমাৰ পক্ষৰ মূল ৰক্ষকৰ ভূমিকা লোৱা চিকিৎসক, চিকিৎসা কৰ্মীৰ লগতে সমূহ ফৰ্নটলাইন যুঁজাৰু যেনে- চৰকাৰ-প্ৰশাসন, পুলিচ, প্ৰেছ আদি বিভিন্ন জৰুৰীকালীন সেৱাত জড়িত লোকক আমি শ্ৰদ্ধা ভৰা ধন্যবাদ-কৃতজ্ঞতা জনাইছোঁ| তাৰ মাজতো আমি এচাম লোকক প্ৰসংশা কৰিবলৈ, উৎসাহ যোগাবলৈ হয়তো ভুলতে পাহৰি থাকিলোঁ| তেখেতসকল হ’ল বিশ্বৰ বিভিন্ন প্ৰান্তৰ কোৱাৰেণটাইন চেন্টাৰ, হাস্পতালক কৰ’নাৰ কদৰ্য গুচাই নিকা কৰা চাফাই কৰ্মী সকল আৰু কৰ’নাক্ৰান্ত হৈ মৃত্যু হোৱা সকলৰ শৱ-দেহ সমূহৰ অগ্নি সংস্কাৰ কৰা বা কবৰ দিয়া ব্যক্তিসকল|পেছা হ’লেও এই বিভীষিকাৰ মাজত নিজৰ প্ৰাণৰ মমতাৰ কথা নাভাবি মানৱজাতিৰ সেৱাত অন্তঃকৰণেৰে উৎসৰ্গিত এই সকল পৰম শ্ৰদ্ধেয় বীৰ যোদ্ধাক আমি সম্ভ্ৰমপূৰ্ণ নমস্কাৰ জনাবই লাগিব, নহ’লে ইতিহাস পঢ়ি ভৱিষ্যত পৃথিৱীৰ নাগৰিক সকলে আজিৰ মানুহক বৰকৈ বেয়া পাই থাকিব| বাকী সকল ফৰ্নটলাইন যোদ্ধাক কৃতজ্ঞতা জনাই আমি, কভিডাক্ৰান্ত সমাজৰ এইসকল অন্যতম ধাৰকক অনিচ্ছাকৃত ভাৱেও যদি প্ৰসংশা কৰিবলৈ পাহৰি যাওঁ, তেতিয়া হ’লে নিজৰ আত্মাৰ ওচৰত আমি লজ্জিত আৰু অকৃতজ্ঞ হৈ ৰ’ম|