বোকাখাতৰ নাহৰজান চাহ বাগিচাত চাঞ্চল্যকৰ ঘটনা৷ বাগিচাৰ কামলৈ লগৰ মহিলাৰ সৈতে গৈ থকা অৱস্থাত স্বামীয়ে পথৰ ওপৰতে পেট্ৰ’ল ঢালি জ্বলাই দিলে পত্নীক৷ পাৰিবাৰিক কন্দলৰ বাবেই এই ঘটনা সংঘটিত হোৱা বুলি সন্দেহ প্ৰকাশ স্থানীয় ৰাইজৰ৷
বাগিচাখনৰ ৩নং লাইনৰ স্বামী মেঘাৰাম নায়কে পত্নী মধু নায়ক কৰ্মকাৰক পেট্ৰ’ল ঢালি জ্বলাই দিয়ে৷ শৰীৰৰ আধা অংশ জ্বলি যোৱা মধু কৰ্মকাৰক স্থানীয় লোকৰ সহযোগত বোকাখাত চিকিৎসালয়ত ভৰ্তি কৰোৱা হয়৷ চিকিৎসালয়ত প্ৰাথমিক চিকিৎসাৰ অন্তত উন্নত চিকিৎসাৰ বাবে মধু কৰ্মকাৰক JMCHলৈ প্ৰেৰণ কৰে৷
ইফালে, একাংশ ক্ষুব্ধ স্থানীয় লোকে এই ঘটনাৰ পিছতে উত্তম–মধ্যম শোধায় স্বামী মেঘাৰাম নায়কক৷ বোকাখাত আৰক্ষী ঘটনাস্থলীত উপস্থিত হৈ মেঘাৰাম নায়কক বোকাখাত চিকিৎসালয়ত ভৰ্তি কৰে৷