দৈনন্দিন বাৰ্তাৰ সেৱা, বিজনী, ৬ নৱেম্বৰঃ বিটিচি নিৰ্বাচনৰ প্ৰচাৰ ক্ৰমাগত ভাবে তুংগত উঠিছে। প্ৰতিটো ৰাজনৈতিক দলে নিজৰ নিজৰ দলৰ প্ৰচাৰ অভিযান অব্যাহত ৰাখিছে। চিৰাং জিলাৰ বিজনী মহকুমাৰ অন্তৰ্গত পচলাবাড়ীত বিপিএফৰ বিশাল নিৰ্বাচনী সভা। ১৭ নং সুভাইঝাৰ সমষ্টিৰ বিপিএফ দলৰ প্ৰাৰ্থী প্ৰভাত বসুমতাৰীৰ সমৰ্থনত অনুষ্ঠিত উক্ত নিৰ্বাচনী সভাত মুখ্য অতিথি হিচাপে উপস্থিত থাকে বিপিএফ দলৰ প্ৰধান হাগ্ৰামা মহিলাৰী। মহিলাৰীয়ে আগন্তুক বিটিচি নিৰ্বাচনত সৰহ সংখ্যক আসন জয় লাভেৰে চৰকাৰ গঠন কৰিব বুলি মন্তব্য কৰে।
আনফালে এইবাৰ বিপিএফৰ চৰকাৰ গঠন হোৱাৰ পিছতেই বিভিন্ন জাতি জনগোষ্ঠীৰ ভূমিহীন লোকক মাটিৰ পাট্টা প্ৰদান কৰিব। বিটিচি নিৰ্বাচনত ইউ পি পি এল দল কোনো ফেক্ট নহয় বুলি কয় হাগ্ৰামা মহিলাৰিয়ে। বিটিচিত চতুৰ্থ বাৰৰ বাবে বিপিএফ দল চৰকাৰ গঠন কৰিব বুলি নিশ্চিত দাবী কৰে। ইয়াৰোপৰি ছয় জনগোষ্ঠীৰ জনজাতি কৰণৰ ক্ষেত্ৰতো বিপিএফে সহায় কৰিব বুলি ঘোষণা কৰে হাগ্ৰামাই।
আনফালে বিপিএফৰ সভাপতি গৰাকীয়ে ভাষণত বিপিএফৰ চৰকাৰ হ’লে ডি ভোটাৰৰ নামত আৰু বিটিচিৰ ৰাইজে হাৰাশাস্তি ভোগ কৰিব নালাগে বুলি মন্তব্য কৰে। সভাত উপস্থিত থাকে মন্ত্ৰী চন্দন ব্ৰহ্ম, ৩৩নং বিজনী বিধান সভা সমষ্টিৰ বিধায়ক কমল সিং নাৰ্জাৰী, ১৮নং মানাস ছেৰফাং সমষ্টিৰ বিপিএফ দলৰ প্ৰাৰ্থী ধনঞ্জয় বসমুতাৰী লগতে ১৮নং মানাস ছেৰফাং সমষ্টিৰ প্ৰাক্তন MCLA সুভাষ বসমুতাৰী। সভাত প্ৰায় দহ সহস্ৰাধিক লোক অংশগ্ৰহণ কৰে।