প্ৰধানমন্ত্ৰীক ব্যৱস্থা গ্ৰহণৰ দাবী আইএমএৰ : দেশত ক’ৰোনাত আক্ৰান্ত হৈ মৃত্যু ১৯৬ চিকিৎসকৰ

দৈনন্দিন বাৰ্তা ডেস্ক : সন্মুখৰ শাৰীৰ পৰা ক’ৰোনাৰ বিৰুদ্ধে যুঁজ অব্যাহত ৰাখিছে চিকিৎসকসকলে৷ ইয়াৰ মাজতে চিকিৎসকো ক’ৰোনাত আক্ৰান্ত হোৱাৰ লগতে মৃত্যুৰ মুখত পৰিছে৷ এনে পৰিস্থিতিত দেশত দুশজন চিকিৎসকৰ মৃত্যু হৈছে৷ ইণ্ডিয়ান মেডিকেল এছ’চিয়েছন (আইএমএ)ৰ এক প্ৰতিবেদনত কোৱা হৈছে যে দেশজুৰি মাৰাত্মক ভাইৰাছৰ সংক্ৰমণত ১৯৬ জন চিকিৎসকৰ মৃত্যু হৈছে৷ অথচ জুলাই মাহৰ মাজভাগত এই সংখ্যা এশজনৰো কম আছিল৷ যোৱা কেইটামান মাহত দেশৰ বিভিন্ন প্ৰান্তত থকা চিকিৎসক, নাৰ্চ, স্বাস্থ্য কৰ্মীৰ মৃত্যুৰ খবৰ আহি আছে৷ ইণ্ডিয়ান মেডিকেল এছ’চিয়েছনৰ তথ্য মতে এই পৰ্যন্ত দেশত ১৯৬ জন চিকিৎসকৰ মৃত্যু হৈছে৷ তাৰ ভিতৰত ১৭০ জন ৫০ বছৰৰ অধিক৷ চিকিৎসক আৰু স্বাস্থ্য কৰ্মীৰ সুৰক্ষা ব্যৱস্থাক লৈ বাৰম্বাৰ অৱগত কৰা হৈছে৷ তেওঁলোকৰ সুৰক্ষাত অৱহেলা কৰা হৈছে বুলি অভিযোগ উঠিছে৷ কিন্তু তাত কোনো গুৰুত্ব দিয়া নাই৷ এনে পৰিস্থিতিত এই বিষয়ত গুৰুত্ব আৰোপ কৰিবলৈ ইণ্ডিয়ান মেডিকেল এছ’চিয়েছনে প্ৰধানমন্ত্ৰীৰ ওচৰত আবেদন কৰিছে৷ এই প্ৰসংগত আইএমএৰ তৰফৰ পৰা জনাইছে যে পৰিস্থিতি উদ্বেগজনক৷ চিকিৎসকৰ সুৰক্ষা নিশ্চিত নকৰিলে স্বাস্থ্য পৰিকাঠামোত ভয়ংকৰ বিপদ আহি পৰিব৷ ইণ্ডিয়ান মেডিকেল এছ’চিয়েছনৰ সৰ্বভাৰতীয় সভাপতি ডাঃ ৰাজন শৰ্মাই কয়, নিজৰ পৰিয়ালক এৰি চিকিৎসকে চিকিৎসালয়ত মাৰাত্মক ভাইৰাছৰ বিৰুদ্ধে যুঁজ কৰি আছে৷ ক’ৰোনা ৰোগীৰ ৱাৰ্ডত ঘণ্টাৰ পাচত ঘণ্টা আছে৷ তেওঁলোকৰ সুৰক্ষা সকলোতকৈ আগত হোৱাৰ প্ৰয়োজন৷ দ্ৰুত কাৰ্যকৰী পদক্ষেপ নল’লে অধিক বিপদৰ মুখামুখি হ’ব পাৰে৷