গুৱাহাটীত কৃত্ৰিম বানৰ ফলত বিভিন্ন স্থানত বোকাময় পৰিবেশঃ মন্ত্ৰী সিদ্ধাৰ্থ ভট্টাচাৰ্যৰ উপস্থিতিত পৌৰনিগমে চাফ কৰিলে গীতানগৰ-চানমাৰি পথ।
গুৱাহাটী : বিগত কেইদিনমান ধৰি অভাবনীয়ভাবে বৰষুণৰ পৰিমাণ বৃদ্ধি পোৱাত মহানগৰীৰ কেইবাস্হানত বোকাময় পৰিবেশৰ সৃষ্টি হৈছে৷ বিশেষকৈ গীতানগৰ, চানমাৰি, শিলপুখুৰী অঞ্চলত পথত অধিক বোকা-পানীৰে উপচি পৰিছে৷ যাৰ বাৰে পথচোৱাৰে গাড়ী-মটৰ অহা-যোৱাত যথেষ্ট অসুবিধাৰ সন্মুখীন হৈছে৷ ইয়াৰ বাবেই গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্যই আজি গীতানগৰ, চানমাৰি, শিলপুখুৰী অঞ্চলত উপস্থিত হৈ পৰ্যবেক্ষণ কৰে৷ মন্ত্ৰী ভট্টাচাৰ্যৰ উপস্থিতিত গুৱাহাটী পৌৰনিগমে তাৎক্ষণিকভাৱে পথসমূহ চাফ কৰা পৰিলক্ষিত হয়৷ মন্ত্ৰী গৰাকীৰ লগত গুৱাহাটী পৌৰনিগমৰ আয়ুক্ত দেৱ্যজ্যেতি হাজৰিকা, মুখ্য অভিযন্তা দেৱজিত দাস, অতিৰিক্ত আয়ুক্ত দ্বীজেন্দ্ৰ সিং, অ’ এছ’ ডি নাৰায়ন আগৰৱাল উপস্থিত থাকে৷ এইক্ষেত্ৰত মন্ত্ৰী সিদ্ধাৰ্থ ভট্টাচাৰ্যই কয় যে আগৰ বছৰ সমূহতকৈ চলিত বৰ্ষত বৰষুণৰ পৰিমাণ যথেষ্ট বৃদ্ধি পাইছে৷ এচাম পাহাৰত বসবাস কৰা মানুহে কিছু মাটি কাটি বাৰিষালৈ দম কৰি ৰাখে৷ বাহিৰা অহাৰ লগে লগে মাটি সমূহ পানীৰ সোঁতত তললৈ নামি আহি পথ সমূহ আবদ্ধ হৈ পাৰে৷ যাৰ বাবেই পথসমূহ বোকাময় পৰিবেশৰ সৃষ্টি হয়৷ ইয়াৰ বাবেই পাহাৰত বসবাস কৰা সমূহ জনসাধৰাণক পাহৰৰ মাটি নাকাটিবলৈ অনুৰোধ জনায়।
