খাৰুপেটীয়াত বৰষুণৰ পানীত খহি পৰিল পকী দলং। নিম্নমানৰ সামগ্রী ব্যৱহাৰ কৰাৰ অভিযোগ, তদন্তৰ দাবী ৰাইজৰ ।

দলগাঁও : নিৰ্মাণ কাৰ্য্য সম্পূৰ্ণ নহওঁতেই সাধাৰণ বৰষুণৰ পানীত খহি পৰিল ২৫ লাখ টকীয়া দলঙ। অতি নিম্নমানৰ সামগ্ৰী ব্যৱহাৰ কৰি কাম কৰাৰ বাবেই বৰষুণৰ পানীত খহি পৰাৰ অভিযোগ ৰাইজৰ। দৰঙৰ খাৰুপেটীয়া-ভকতপাৰা সংযোগী পথৰ বাহাবাৰী গাঁৱত নিৰ্মাণ হৈ থকা পকী দলঙখন বৰষুণৰ পানীত খহি যোৱাত প্ৰতিক্ৰিয়াৰ সৃষ্টি হৈছে ৰাইজৰ মাজত। দলঙৰ উজনিত মথাউৰী বান্ধ নিৰ্মাণ নকৰাৰ বাবে টাংনী নদীৰ বাঢ়নী পানীয়ে বাহাবাৰী গাঁৱৰ এইটো পথেৰে বৈ গৈ ভাবুকি কঢ়িয়াই আনিছে নিৰ্মিয়মান পকী দলং খনলৈ। কেইবাদিন ধৰি হৈ থকা নেৰানেপেৰা বৰষুণৰ ফলত টাংনী নদীৰ পানী উফন্দি উঠাৰ ফলত দলংখনৰ এটা অংশ খহি যোৱাত যাতায়ত ব্যৱস্থা ব্যাহত হৈ পৰে। পুনিয়া, ঘেনামাৰী, ভোটপুখুৰী, নিজ বৰুৱাঝাৰ আদি গাঁৱৰ ৰাইজৰ যাতায়তৰ একমাত্ৰ পথত থকা দলং খন বিধস্ত হোৱাত বহু অসুবিধাৰ সন্মুখীন হৈছে অঞ্চলবাসীয়ে। উল্লেখ্য যে দলংখনৰ নিৰ্মাণ কাৰ্য্য আৰম্ভ হোৱাৰ পৰাই অতি নিম্নমানৰ হোৱা বুলি অভিযোগ উত্থাপিত হৈ আহিছিল যদিও ঠিকাদাৰ জনে বিধায়ক ইলিয়াছ আলীৰ ঘণিষ্ঠ হোৱাৰ বাবেই ৰাইজৰ অভিযোগক কোনো গুৰুত্ব নিদি চলাই গৈছিল দলঙখনৰ কাম। সেয়েহে উচ্চ পৰ্যায়ৰ তদন্ত কৰি লুণ্ঠনৰূপী ঠিকাদাৰ জনৰ বিৰূদ্ধে বিহীত ব্যৱস্থা ল’বলৈ দাবী জনাইছে স্থানীয় ৰাইজে।